ഏഷ്യാനെറ്റില്‍ സംപ്രേഷണം ചെയ്യുന്ന ജനപ്രിയ പരമ്പരയാണ് കുടുംബവിളക്ക്. ഇതിലെ കഥാപാത്രങ്ങളെല്ലാം കുടുംബപ്രേക്ഷകര്‍ക്ക് പ്രിയപ്പെട്ടവരാണ്. കഴിഞ്ഞ ദിവസം സീരിയലിന്റെ പ്രമോഷനുമായി ബന്ധപ്പെട്ട് നല്‍കിയ ഒരു കല്യാണ പരസ്യം സോഷ്യല്‍ മീഡിയയില്‍ വൈറലായിരുന്നു. ഇപ്പോഴിതാ ആ വിവാഹം നടന്നിരിക്കുകയാണ്. സീരിയല്‍ കഥാപാത്രങ്ങളായ സുമിത്രയുടേയും രോഹിത്തിന്റേയും വിവാഹമാണ് നടന്നത്.
മുന്‍ ഭര്‍ത്താവ് സിദ്ധുവിനെയും അയാളുടെ ഭാര്യയേയും സാക്ഷി നിര്‍ത്തിയാണ് രോഹിത്ത് സുമിത്രയുടെ കഴുത്തില്‍ താലികെട്ടിയത്. സിദ്ധുവിന്റെ അച്ഛന്‍ ശിവദാസന്‍ ആയിരുന്നു പ്രധാന കാരണവരുടെ സ്ഥാനത്ത്. സുമിത്രയുടെ വീട്ടുകാരും സീരിയലിലെ പ്രധാന താരങ്ങളും എല്ലാം ഒത്തുചേര്‍ന്ന ഗ്രാന്‍ഡ് എപ്പിസോഡ് ആയിരുന്നു സുമിത്രയുടെ വിവാഹം. വിവാഹം മുടക്കാന്‍ സിദ്ധു നടത്തിയ തന്ത്രങ്ങള്‍ എല്ലാം പൊളിയുന്നതും ഈ എപ്പിസോഡില്‍ കാണിക്കുന്നുണ്ട്.
മലയാളത്തിലെ ടെലിവിഷനില്‍ ഏറ്റവും ജനപ്രിയമായ ടിവി സീരിയലുകളില്‍ ഒന്നാണ് കുടുംബ വിളക്ക്. ഭര്‍ത്താവില്‍ നിന്നും അവഗണന നേരിട്ട് ഇരുപത്തിയഞ്ച് വര്‍ഷത്തോളം ജീവിച്ച സുമിത്ര എന്ന വീട്ടമ്മയുടെ ഉയര്‍ത്തെഴുന്നേല്‍പ്പിന്റെ കഥയാണ് സീരിയല്‍ പറയുന്നത്. തിങ്കള്‍ മുതല്‍ വെള്ളിവരെയാണ് സീരിയല്‍ സംപ്രേഷണം ചെയ്യുന്നത്.
