ബോളിവുഡ് നടി സോനം കപൂറിന്റേയും ഭര്‍ത്താവും വ്യവസായിയുമായ ആനന്ദ് അഹൂജയുടെയും വസതിയില്‍ മോഷണം. ആനന്ദിന്റെ മാതാപിതാക്കള്‍ താമസിക്കുന്ന ഡല്‍ഹിയിലെ വസതിയിലാണ് മോഷണം നടന്നത്. 1.41 കോടിയുടെ പണവും സ്വര്‍ണവും മോഷണം പോയെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
അമൃത ഷെര്‍ഗില്‍ മാര്‍ഗിലാണ് വീട് സ്ഥിതി ചെയ്യുന്നത്. സോനം കപൂറിന്റെ ഭര്‍തൃമാതാവാണ് തങ്ങളുടെ വീട്ടില്‍ നടന്ന കവര്‍ച്ചയെക്കുറിച്ച് തുഗ്ലക്ക് റോഡ് പൊലീസ് സ്റ്റേഷനില്‍ പരാതി നല്‍കിയത്. ഫെബ്രുവരി 11ന് അലമാരയില്‍ സൂക്ഷിച്ചിരുന്ന ആഭരണങ്ങളും പണവും പരിശോധിച്ചപ്പോഴാണ് മോഷണം നടന്ന വിവരം അറിഞ്ഞതെന്ന് പരാതിയില്‍ പറയുന്നു. ഫെബ്രുവരി 23നാണ് പരാതി നല്‍കുന്നത്. എന്നാല്‍ ഇത് സംബന്ധിച്ച വിവരങ്ങള്‍ പുറത്തുവരുന്നത് ഇപ്പോഴാണ്.
കേസന്വേഷണത്തിനായി സ്‌പെഷ്യല്‍ സ്‌ക്വാഡിനെ രൂപീകരിച്ചിട്ടുണ്ട്. അന്വേഷണത്തിന്റെ ഭാഗമായി സോനത്തിന്റെയും ആനന്ദിന്റെയും സ്റ്റാഫുകളെ ചോദ്യം ചെയ്തു. ഒന്‍പത് കെയര്‍ടേക്കര്‍മാര്‍, ഡ്രൈവര്‍മാര്‍, തോട്ടക്കാര്‍, മറ്റ് തൊഴിലാളികള്‍ എന്നിവരെ കൂടാതെ 25 ജീവനക്കാരെ ഡല്‍ഹി പൊലീസ് ചോദ്യം ചെയ്തതായാണ് റിപ്പോര്‍ട്ട്.
