കാഴ്ച്ചക്കാരായി കവളപ്പാറയിലേക്ക് ആരും വരരുത്; അഭ്യർത്ഥനയുമായി സണ്ണി വെയ്ൻ

പ്രളയം ഏറ്റവും ഭീകരമായി ബാധിച്ച മേപ്പാടിയിലും കവളപ്പാറയിലും കാഴ്ച്ചക്കാര്‍ രക്ഷാപ്രവര്‍ത്തനത്തിന് വിലങ്ങുതടിയാവുകയാണ്. ഉരുള്‍പൊട്ടലില്‍ ഒരു പ്രദേശം മുഴുവന്‍ ഒലിച്ചു പോയ സംഭവസ്ഥലം നേരിട്ടു കാണാനായി നിരവധിയാളുകളാണ് വാഹനങ്ങളിലും മറ്റുമായി ഇവിടേയ്ക്ക് എത്തുന്നത്. ഇതിനാല്‍ രക്ഷാപ്രവര്‍ത്തകര്‍ക്കുള്ള വാഹനങ്ങള്‍ പോലും പലയിടത്തും കുടുങ്ങി കിടക്കുന്ന അവസ്ഥയാണുള്ളത്. അങ്ങനെയൊരു അവസരത്തിൽ കാഴ്ച്ചക്കാരായി ആരും അങ്ങോട്ട് വരരുതെന്ന് അഭ്യർത്ഥനയുമായി എത്തിയിരിക്കുകയാണ് നടൻ സണ്ണി വെയ്ൻ.

കവളപ്പാറയിലേക്ക് ആളുകളുടെ ഒഴുക്കാണ്, ദുരിതാശ്വാസ പ്രവർത്തനങ്ങൾക്ക് വേണ്ടി അല്ല കെട്ടോ, ലീവ് ആയത് കൊണ്ട് ഉരുൾപ്പൊട്ടിയ സ്ഥലം കാണാൻ വന്നവരാണത്രേ. ഇവരെ കൊണ്ടും ഇവര് വന്ന വാഹനങ്ങളെ കൊണ്ടും രക്ഷാപ്രവർത്തകർക്ക് ഉണ്ടാവുന്ന ബുദ്ധിമുട്ട് ചില്ലറയല്ല, കിലോമീറ്റർ കണക്കിന് ബ്ലോക്കാണ്, ആംബുലൻസ് ഉൾപ്പെടെയുള്ള രക്ഷാപ്രവർത്തകരുടെ വാഹനങ്ങൾ കുടിങ്ങി കിടക്കുന്നു.

കാഴ്ച്ചക്കാരായി കവളപ്പാറയിലേക്ക് പോവാതിരിക്കുക എന്നതാണ് ഈ സമയത്തെ ഏറ്റവും വലിയ രക്ഷാപ്രവർത്തനം…