ഫ്രൈഡേ ഫിലിംസിന്റെ ബാനറില്‍ വിജയ് ബാബു നിര്‍മിക്കുന്ന ചിത്രത്തിന്റെ ഷൂട്ടിംഗ് കണ്ണൂര്‍ പയ്യന്നൂരില്‍ ആരംഭിച്ചു. നവാഗതനായ ആദിത്യന്‍ ചന്ദ്രശേഖറാണ് ചിത്രത്തിന്റെ സംവിധായകന്‍. സുരാജ് വെഞ്ഞാമ്മൂട്, ബേസില്‍ ജോസഫ്, സൈജു കുറുപ്പ് എന്നിവരാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നു. ഫ്രൈഡേ ഫിലിസിംന്റെ ബാനറില്‍ നിര്‍മിക്കുന്ന 19-ാമത്തെ ചിത്രമാണിത്. ടൈറ്റില്‍ തീരുമാനിച്ചിട്ടില്ല.
വെബ് സീരിസുകളിലൂടെ സിനിമാ രംഗത്തേക്ക് എത്തിയതാണ് ആദിത്യന്‍ ചന്ദ്രശേഖര്‍. ആവറേജ് അമ്പിളി, സെബാസ്റ്റ്യന്റെ വെള്ളിയാഴ്ച്ച എന്നീ വെബ് സീരിസുകള്‍ ഒരുക്കിയത് ആദിത്യനായിരുന്നു. വിനീത് ശ്രീനിവാസന്‍ സംവിധാനം ചെയ്ത ഹൃദയത്തില്‍ ജോ എന്ന കഥാപാത്രത്തെ അവതരിപ്പിച്ചത് ആദിത്യനാണ്. ആദിത്യനും അര്‍ജുന്‍ നാരായണനും ചേര്‍ന്നാണ് ചിത്രത്തിന്റെ കഥ രചിച്ചത്. ഉത്തര മലബാറിന്റെ ഗ്രാമീണ പശ്ചാത്തലത്തിലാണ് കഥ പറയുന്നത്.
നിരഞ്ജന അനൂപാണ് ചിത്രത്തിലെ നായിക കഥാപാത്രത്തെ അവതരിപ്പിക്കുന്നത്. തന്‍വി റാം, രാജേഷ് ശര്‍മ്മ, അഭി റാം രാധാകൃഷ്ണന്‍ എന്നിവരാണ് മറ്റ് അഭിനേതാക്കള്‍. ജിതിന്‍സ്റ്റാന്‍സിലോസ് ആണ് ഛായാഗ്രഹണം. ലിജോ പോളാണ് എഡിറ്റിംഗ് നിര്‍വഹിക്കുന്നത്. മനു മഞ്ജിത്ത്, വിനായക് ശശികുമാര്‍ എന്നിവരുടെ വരികള്‍ക്ക് ഈണം പകരുന്നത് ഇഫ്തിയാണ്.
