ജോജു ജോര്‍ജ് നായകനായി എത്തുന്ന ഇരട്ടയില്‍ നായികയായി തെന്നിന്ത്യന്‍ താരം അഞ്ജലി എത്തുന്നു. പേരന്‍പില്‍ മമ്മൂട്ടിയുടെ നായികയായി എത്തിയ താരം നിരവധി ചിത്രങ്ങളില്‍ നിര്‍ണായക കഥാപാത്രങ്ങളെ അവതരിപ്പിച്ചിട്ടുണ്ട്. ജോജു ജോര്‍ജ് ഇരട്ട വേഷത്തില്‍ എത്തുന്ന ചിത്രം സംവിധാനം ചെയ്യുന്നത്. നവാഗതനായ രോഹിത് എം ജി കൃഷ്ണന്‍ ആണ്
2006ല്‍ ഫോട്ടോ എന്ന തെലുങ്ക് ചിത്രത്തിലൂടെയാണ് അഞ്ജലി അഭിനയ രംഗത്ത് എത്തിയത്. കട്രാദു തമിഴ് എന്ന ചിത്രത്തിലൂടെയാണ് തമിഴ് സിനിമാ ലോകത്ത് എത്തിയത്. അങ്ങാടി തെരുവ് ന്നെ ചിത്രത്തില്‍ അഞ്ജലി അവതരിപ്പിച്ച സെര്‍മക്കാനി എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു. ഇതിനിടെ മലയാളത്തില്‍ പയ്യന്‍സ് എന്ന ചിത്രത്തില്‍ വേഷമിട്ടു. പേരന്‍പില്‍ വിജയലക്ഷ്മി എന്ന കഥാപാത്രത്തെയായിരുന്നു അവതരിപ്പിച്ചത്. കഴിഞ്ഞ വര്‍ഷം രണ്ട് ചിത്രങ്ങള്‍ അഞ്ജലിയുടേതായി പുറത്തിറങ്ങിയിരുന്നു.
ഫെബ്രുവരി രണ്ടിനാണ് ‘ഇരട്ട’ തീയറ്ററുകളില്‍ എത്തുന്നത്. ജോജു ജോര്‍ജിന്റെ കരിയറിലെ ഏറ്റവും മികച്ച രണ്ടു കഥാപാത്രങ്ങളായിരിക്കും ഇരട്ടയിലേത് എന്ന് ചിത്രത്തിന്റ അണിയറ പ്രവര്‍ത്തകര്‍ സൂചിപ്പിച്ചിട്ടുണ്ട്. ജോജുവിന്റെ ഉടമസ്ഥതയിലുള്ള അപ്പു പാത്തു പാപ്പു പ്രൊഡക്ഷന്‍സും മാര്‍ട്ടിന്‍ പ്രക്കാട്ട് ഫിലിംസും സിജോ വടക്കനും ചേര്‍ന്നാണ് ചിത്രത്തിന്റെ നിര്‍മ്മാണം. ശ്രിന്ദ, ആര്യ സലിം, ശ്രീകാന്ത് മുരളി, സാബുമോന്‍, അഭിരാം എന്നിവരാണ് ‘ഇരട്ട’യിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. സമീര്‍ താഹിറിന്റെയും, ഷൈജു ഖാലിദിന്റെയും ഗിരീഷ് ഗംഗാധരന്റെയും കൂടെ ഛായാഗ്രഹണ മേഖലയില്‍ പ്രവര്‍ത്തിച്ച വിജയ് ആണ് ഇരട്ടയുടെ ഡിഒപി. ജേക്‌സ് ബിജോയാണ് സംഗീത സംവിധാനം, അന്‍വര്‍ അലിയുടേതാണ് വരികള്‍. മനു ആന്റണി ആണ് ചിത്രത്തിന്റെ എഡിറ്റര്‍. ആര്‍ട്ട്-ദിലീപ് നാഥ്, വസ്ത്രലങ്കാരം-സമീറ സനീഷ്, മേക്കപ്പ്-റോണെക്‌സ്, സംഘട്ടനം-കെ രാജശേഖര്‍, മാര്‍ക്കറ്റിംഗ്-മീഡിയ പ്ലാന്‍ ഒബ്‌സ്‌ക്യൂറ.
