കുറുപ്പിന്റെ ഒഫീഷ്യൽ ഇൻസ്റ്റാഗ്രാം അക്കൗണ്ട് വെളിപ്പെടുത്തി അണിയറപ്രവർത്തകർ; വെളിപ്പെടുത്തൽ അഹാനക്ക് ലഭിച്ച കമന്റിന് പിന്നാലെ?

ഈ ദിവസങ്ങളിൽ ഏറെ വാഴ്ത്തപ്പെടലുകൾക്കും അതേ പോലെ തന്നെ കുറ്റപ്പെടുത്തലുകൾക്കും ഇരയായ നടിയാണ് അഹാന കൃഷ്ണ. ഒരൊറ്റ ഇൻസ്റ്റാഗ്രാം സ്റ്റോറിയിൽ നിന്നുമാണ് എല്ലാത്തിന്റെയും തുടക്കം. ഇന്നലെ ഇറങ്ങിയ ദുൽഖർ സൽമാൻ ചിത്രം കുറുപ്പിന്റെ സ്നീക്ക് പീക്ക് പങ്ക് വെച്ച ഛായാഗ്രാഹകൻ നിമിഷ് രവിയുടെ ഇൻസ്റ്റാഗ്രാം പോസ്റ്റിൽ അഹാന ഇട്ട കമന്റ് ശ്രദ്ധ നേടിയിരുന്നു. നല്ല വീഡിയോ പക്ഷേ തമ്പ്നെയിൽ കൊള്ളില്ല, നിങ്ങളൊക്കെ എന്ന് പഠിക്കുമെന്നാണ് അഹാന കമന്റ് ചെയ്‌തത്‌. ആ കമന്റിന് മറുപടിയായി അയിന് നീ ഏതാ എന്നൊരു കമന്റ് കുറുപ്പ് മൂവി ഒഫീഷ്യൽ എന്നൊരു പേജിൽ നിന്നും വന്നിരുന്നു. ഇപ്പോളിതാ ഒഫീഷ്യൽ ഇൻസ്റ്റാഗ്രാം അക്കൗണ്ട് ഏതാണെന്ന് വെളിപ്പെടുത്തിയിരിക്കുകയാണ് കുറുപ്പ് മൂവിയുടെ അണിയറപ്രവർത്തകർ. കുറുപ്പ് മൂവിയുടെ പേരിലുള്ള മറ്റ് അക്കൗണ്ടുകളുമായി യാതൊരു ബന്ധവും ഇല്ലെന്നും അവർ വ്യക്തമാക്കിയിട്ടുണ്ട്.

കുറുപ്പിന്റെ നിർമാണം ദുൽഖർ സൽമാന്റെ ഉടമസ്ഥതയിലുള്ള വേഫറെർ ഫിലിംസും എം സ്റ്റാർ എന്റർടൈൻമെൻറ്സും ചേർന്നാണ്. കേരളം, അഹമ്മദാബാദ്, ബോംബെ, ദുബായ്, മാംഗ്ളൂർ, മൈസൂർ എന്നിവിടങ്ങളിലായി ആറു മാസം നീണ്ടുനിന്ന ചിത്രീകരണമാണ് കുറുപ്പിന് വേണ്ടി നടത്തിയത്. 105 ദിവസങ്ങൾ പൂർണമായും ഷൂട്ടിങ്ങിനായി ചിലവഴിച്ചു. യുവതാരം ദുൽഖർ സൽമാൻ സിനിമാ ലോകത്തേക്ക് പ്രവേശിച്ചത് ശ്രീനാഥ് രാജേന്ദ്രൻ ഒരുക്കിയ സെക്കൻഡ് ഷോ എന്ന ചിത്രത്തിലൂടെയാണ്. ദുൽഖറിനെ നായകനാക്കി ശ്രീനാഥ് രാജേന്ദ്രൻ സംവിധാനം നിർവഹിക്കുന്ന അടുത്ത ചിത്രമാണ് കുറുപ്പ്.

കേരളത്തിലെ കുപ്രസിദ്ധ പിടികിട്ടാപ്പുള്ളി സുകുമാരക്കുറുപ്പിന്റെ ജീവിതത്തെ ആസ്പദമാക്കി ഒരുക്കുന്ന ചിത്രത്തിന്റെ ഡബ്ബിങ് പൂർത്തിയായി. പെരുന്നാൾ റിലീസായി തയ്യാറെടുത്ത ചിത്രം കോവിഡ് 19 പടർന്ന് പിടിക്കുന്ന സാഹചര്യത്തിൽ ലോക്ക് ഡൗൺ പ്രഖ്യാപിച്ചതിനെ തുടർന്ന് നീണ്ടു പോയിരിക്കുകയാണ്. ജിതിൻ കെ ജോസ് കഥ ഒരുക്കിയിരിക്കുന്ന ചിത്രത്തിന്റെ തിരക്കഥയും സംഭാഷണവും ഒരുക്കിയിരിക്കുന്നത് ഡാനിയേൽ സായൂജ് നായരും കെ എസ് അരവിന്ദും ചേർന്നാണ്. നിമിഷ് രവി ഛായാഗ്രഹണവും സുഷിൻ ശ്യാം സംഗീത സംവിധാനവും നിർവഹിക്കുന്നു. ക്രീയേറ്റീവ് ഡയറക്ടറായി വിനി വിശ്വ ലാലും കുറുപ്പിന് പിന്നിലുണ്ട്. കമ്മാരസംഭവത്തിലൂടെ മികച്ച പ്രൊഡക്ഷൻ ഡിസൈനുള്ള ദേശീയ അവാർഡ് കരസ്ഥമാക്കിയ ബംഗ്ലാനാണ് ചിത്രത്തിന്റെ പ്രൊഡക്ഷൻ ഡിസൈനർ. മറ്റൊരു ദേശീയ അവാർഡ് ജേതാവായ വിവേക് ഹർഷനാണ് എഡിറ്റിംഗ് നിർവഹിക്കുന്നത്.

മൂത്തോൻ എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിത ധുലിപാലയാണ് ചിത്രത്തിലെ നായിക. ഇവരെ കൂടാതെ ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി ബാലചന്ദ്രൻ, സുരഭി ലക്ഷ്മി, ശിവജിത് പദ്മനാഭൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്. മലയാള സിനിമ ഏറ്റവും കൂടുതൽ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്ന് കൂടിയാണ് കുറുപ്പ്.