മോഹന്‍ലാലിനെ നായകനാക്കി ബി ഉണ്ണികൃഷ്ണന്‍ സംവിധാനം ചെയ്ത ആറാട്ടിലെ വിഡിയോ ഗാനം പുറത്തുവന്നു. ‘താരുഴിയും’ എന്ന് തുടങ്ങുന്ന ഗാനം കെ. എസ് ഹരിശങ്കറും പൂര്‍ണശ്രീ ഹരിദാസും ചേര്‍ന്നാണ് ആലപിച്ചിരിക്കുന്നത്. നികേഷ് ചെമ്പിലോടിന്റെ വരികള്‍ക്ക് ഈണം പകര്‍ന്നിരിക്കുന്നത് രാഹുല്‍ രാജാണ്.
മികച്ച ദൃശ്യഭംഗികൂടി സമ്മാനിച്ചാണ് ഗാനം പ്രേക്ഷകരിലെത്തിയിരിക്കുന്നത്. വളരെ കുറഞ്ഞ സമയം കൊണ്ടുതന്നെ ഗാനം ആരാധകര്‍ ഏറ്റെടുത്തു. യൂട്യൂബ് ട്രെന്‍ഡിംഗിലും ഗാനം ഇടംപിടിച്ചു.
വില്ലന്‍ എന്ന ചിത്രത്തിന് ശേഷം മോഹന്‍ലാലിനെ നായകനാക്കി ബി. ഉണ്ണികൃഷ്ണന്‍ സംവിധാനം ചെയ്ത ചിത്രമാണ് ആറാട്ട്. ഉദയകൃഷ്ണയാണ് ചിത്രത്തിന്റെ തിരക്കഥ ഒരുക്കിയത്. വിജയരാഘവന്‍, സായികുമാര്‍, സിദ്ദിഖ്, ജോണി ആന്റണി, ഇന്ദ്രന്‍സ്, ശ്രദ്ധ ശ്രീനാഥ്, രചന നാരായണന്‍കുട്ടി, സ്വാസിക തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്.
