ദളപതി വിജയിയെ നായകനാക്കി ലോകേഷ് കനകരാജ് ഒരുക്കുന്ന ഏറ്റവും പുതിയ ചിത്രമാണ് ലിയോ. വമ്പൻ വിജയം നേടിയ മാസ്റ്ററിനു ശേഷം ഈ ടീം ഒന്നിക്കുന്ന ചിത്രമാണ് ലിയോ. ലിയോ സിനിമയുടെ ചിത്രീകരണം നിലവിൽ കശ്മീരിൽ പുരോഗമിക്കുകയാണ്. ചിത്രത്തിന്റെ ടൈറ്റിൽ വീഡിയോ പുറത്തു വന്നപ്പോൾ തന്നെ ചിത്രത്തിലെ വിജയിയുടെ ലുക്കും പുറത്തു വന്നിരുന്നു. ഇപ്പോൾ ചിത്രത്തിന്റെ ലൊക്കേഷനിൽ നിന്നുള്ള ഒരു വീഡിയോ ലീക്ക് ആയിരിക്കുകയാണ്.
ഇതിൽ വിജയിയെ കാണാൻ സാധിക്കുന്നത് ടൈറ്റിൽ വീഡിയോയിൽ കണ്ടതിൽ നിന്ന് മാറ്റമില്ലാത്ത ലുക്കിലാണ്. അതേസമയം, ചിത്രത്തിൽ വിജയിക്ക് മറ്റൊരു ലുക്ക് കൂടി ഉണ്ടെന്നാണ് റിപ്പോർട്ടുകൾ. ചിത്രത്തിൽ നായികയായി എത്തുന്നത് തൃഷയാണ്. അതേസമയം, വില്ലൻ വേഷത്തിൽ ബോളിവുഡ് സൂപ്പർ താരം സഞ്ജയ് ദത്ത് ആണ് എത്തുന്നത്.
ചിത്രം രചിച്ചിരിക്കുന്നത് ലോകേഷ് കനകരാജ് – രത്ന കുമാർ – ധീരജ് വൈദി എന്നിവർ ചേർന്നാണ്. അനിരുദ്ധ് രവിചന്ദർ സംഗീതം ഒരുക്കുന്ന ചിത്രത്തിൽ ആക്ഷൻ കിംഗ് അർജുൻ, സംവിധായകനായ മിഷ്കിൻ, ഗൗതം വാസുദേവ് മേനോൻ, മലയാള താരം മാത്യു തോമസ്, സാൻഡി, പ്രിയ ആനന്ദ് എന്നിവരും വേഷമിടുന്നു. മനോജ് പരമഹംസയാണ് ക്യാമറ. എഡിറ്റ് ചെയ്യുന്നത് ഫിലോമിൻ രാജ് ആണ്. സെവൻ സ്ക്രീൻ സ്റ്റുഡിയോസ് നിർമ്മിക്കുന്ന ലിയോ ഈ വർഷം ഒക്ടോബർ 19 നാണ് റിലീസ് ചെയ്യാൻ ഒരുങ്ങുന്നത്. വമ്പൻ ബഡ്ജറ്റിൽ ഒരുങ്ങുന്ന ഈ ആക്ഷൻ ചിത്രം ലോകേഷ് സിനിമാറ്റിക് യൂണിവേഴ്സിന്റെ ഭാഗമാണോ എന്നറിയാൻ കൂടിയുള്ള ആകാംക്ഷയിലാണ് ആരാധകർ.
