KGF, വിക്രം, ഭീഷ്മപർവം എന്നീ ചിത്രങ്ങൾക്ക് ശേഷം ഈ വർഷത്തെ ബെസ്റ്റ് തിയറ്റർ എക്സ്പീരിയൻസ് ആയി ‘തല്ലുമാല’

തിയറ്ററുകൾ പൂരപ്പറമ്പാക്കി ‘തല്ലുമാല’ സിനിമ വിജയകരമായി പ്രദർശനം തുടരുകയാണ്. ടൊവിനോ തോമസ്, കല്യാണി പ്രിയദർശൻ എന്നിവരെ നായകരാക്കി ഖാലിദ് റഹ്മാൻ സംവിധാനം ചെയ്ത ചിത്രം റിലീസ് ചെയ്ത അന്നുമുതൽ തന്നെ മികച്ച അഭിപ്രായമാണ് നേടിയത്. തിയറ്ററുകളിൽ വമ്പൻ ഹിറ്റായ കെ ജി എഫ്, വിക്രം, ഭീഷ്മപർവം എന്നീ ചിത്രങ്ങൾക്ക് പിന്നാലെ ഈ വർഷത്തെ മികച്ച തിയറ്റർ എക്സ്പീരിയൻസ് കൂടിയായി മാറിയിരിക്കുകയാണ് ഈ ചിത്രം. മിക്ക തിയറ്ററുകൾക്ക് മുമ്പിലും ഹൗസ്ഫുൾ ബോർഡുകൾ ഇടം പിടിച്ചു. മിക്ക ഷോകൾക്കും വളരെ പെട്ടെന്നാണ് ടിക്കറ്റുകൾ തീർന്നു പോകുന്നത്. അതിനാൽ തന്നെ മിക്ക തിയറ്ററുകളിലും സ്പെഷ്യൽ ഷോകൾ ആരംഭിച്ചു. വെള്ളിയാഴ്ച രാത്രി 65ൽ അധികം തിയറ്ററുകളിലാണ് മിഡ്നൈറ്റ് ഷോകൾ നടത്തിയത്.

തിയറ്ററുകളിൽ മണവാളൻ വസീമിന്റെയും പിള്ളാരുടെയും വിളയാട്ടം തരംഗമായിരിക്കുകയാണ്. ബുക്ക് മൈ ഷോയിൽ ഈ അടുത്ത കാലത്തൊന്നും ഇത്ര വേഗത്തിൽ ടിക്കറ്റുകൾ വിറ്റുപോയിട്ടില്ല. ചിത്രം റിലീസ് ആയി ആദ്യ മണിക്കൂറുകളിൽ തന്നെ വളരെ പോസിറ്റീവ് ആയിട്ടുള്ള റിവ്യൂ ആണ് ചിത്രത്തിന് ലഭിക്കുന്നത്. സിനിമ റിലീസ് ചെയ്യുന്നതിന് രണ്ടു ദിവസം മുമ്പ തന്നെ പ്രി റിലീസ് ബുക്കിംഗ് ആരംഭിച്ചിരുന്നു. റിലീസിന് മുമ്പ് തന്നെ ഒരു കോടിയോളമാണ് ചിത്രം പ്രി റിലീസ് ബുക്കിംഗിലൂടെ സ്വന്തമാക്കിയത്.

ടൊവിനോ തോമസിന്റെ കരിയർ ബെസ്റ്റ് ഓപ്പണിംഗ് ആയി മാറിയിരിക്കുകയാണ് തല്ലുമാല. ഖാലിദ് റഹ്മാൻ സംവിധാനം ചെയ്തിരിക്കുന്ന ചിത്രതതിന്റെ രചന മുഹ്സിൻ പെരാരിയും അഷ്റഫ് ഹംസയും ചേർന്നാണ്. കല്യാണി പ്രിയദർശൻ നായികയായി എത്തുന്ന ചിത്രത്തിൽ ഷൈൻ ടോം ചാക്കോയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ആഷിക്ക് ഉസ്മാന്റെ പ്രൊഡക്ഷൻസിന്റെ ബാനറിൽ ആഷിക്ക് ഉസ്മാൻ ആണ് ചിത്രത്തിന്റെ നിർമാണം. ഷൈൻ ടോം ചാക്കോ, ലുക്മാൻ, ചെമ്പൻ വിനോദ് ജോസ്, ജോണി ആന്റണി, ഓസ്റ്റിൻ, അസിം ജമാൽ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിൽ ഇരുപതു വയസുകാരനായ മണവാളൻ വസിം എന്ന കഥാപാത്രമായാണ് ടൊവിനോ എത്തുന്നത്. ബീപാത്തു എന്നാണ് കല്യാണിയുടെ കഥാപാത്രത്തിന്റെ പേര്. തലശ്ശേരി, ദുബായ്, കണ്ണൂരിലെ പരിസരങ്ങൾ എന്നിവിടങ്ങളിലായാണ് സിനിമയുടെ ചിത്രീകരണം നടന്നത്.