ടൊവിനോ തോമസിനെ നായകനാക്കി ഖാലിദ് റഹ്‌മാന്‍ സംവിധാനം ചെയ്ത ചിത്രമാണ് തല്ലുമാല. മികച്ച പ്രതികരണവുമായി മുന്നേറുന്ന ചിത്രം ബോക്‌സ്ഓഫിസുകളെ ഇളക്കി മറിച്ചിരിക്കുകയാണ്. റിലീസ് ചെയ്ത് നാല് ദിവസം പിന്നിടുമ്പോള്‍ ചിത്രം നേടിയത് 30.5 കോടി രൂപയാണ്.
സ്വാതന്ത്ര്യദിനത്തില്‍ ചിത്രം കേരളത്തില്‍ നിന്ന് മാത്രം നേടിയത് 2.85 കോടി രൂപയാണ്. മറ്റിടങ്ങളില്‍ നിന്നായി ആകെ 4 കോടി രൂപ കളക്ട് ചെയ്തു. ഇതുവരെ നേടിയ 30.5 കോടിയില്‍ കേരളത്തില്‍ നിന്ന് മാത്രം ലഭിച്ചത് 13.85 കോടിയാണ്. ആദ്യ ദിന കളക്ഷനിലും തല്ലുമാല റെക്കോര്‍ഡ് സൃഷ്ടിച്ചതായാണ് റിപ്പോര്‍ട്ടുകള്‍. കേരളത്തില്‍ നിന്ന് മാത്രം 3.55 കോടി രൂപ കളക്ട് ചെയ്തതായാണ് അനലിസ്റ്റുകള്‍ നല്‍കുന്ന സൂചന. ടൊവിനോയുടെ ഏറ്റവും മികച്ച ആദ്യ ദിന കളക്ഷനാണിത്.
ടൊവിനോ തോമസിന് പുറമേ ലുക്മാന്‍, ഷൈന്‍ ടോം ചാക്കോ തുടങ്ങിയവര്‍ വലിയ കയ്യടി തന്നെ നേടുന്നുണ്ട്. ചടുലമായ രണ്ടാം പകുതിയാണ് സിനിമയുടെ ഏറ്റവും വലിയ പ്ലസ് എന്നാണ് പ്രേക്ഷക അഭിപ്രായം. ചെമ്പന്‍ വിനോദ്, ജോണി ആന്റണി, ഓസ്റ്റിന്‍, കല്ല്യാണി പ്രിയദര്‍ശനും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
