മലയാളി പ്രേക്ഷകരുടെ പ്രിയപ്പെട്ട യുവനടൻ സൗബിൻ ഷാഹിർ നായകനായി എത്തുന്ന പുതിയ ചിത്രമാണ് അയൽവാശി. ചിത്രത്തിലെ കല്യാണപ്പാട്ട് കഴിഞ്ഞദിവസം റിലീസ് ചെയ്തു. തണ്ടലുബാരിയേ എന്ന പേരിൽ എത്തിയ ഗാനത്തിന് മികച്ച വരവേൽപ്പാണ് ലഭിച്ചത്. മ്യൂസിക് 24 7 ന്റെ യുട്യൂബ് ചാനലിലൂടെയാണ് പാട്ട് റിലീസ് ചെയ്തത്. സുഹൈൽ കോയയുടെ വരികൾക്ക് ജേക്സ് ബിജോയ് ആണ് സംഗീതം നൽകിയിരിക്കുന്നത്. അശ്വിൻ വിജയൻ, അഖിൽ ജെ ചന്ദ്, ശ്രുതി ശിവദാസ്, വൈഗ നമ്പ്യാ‍ർ എന്നിവരാണ് ഗാനം ആലപിച്ചിരിക്കുന്നത്.
ഇത്തവണത്തെ ഈദ് കാലത്ത് തിയറ്ററുകൾ കീഴടക്കാൻ ആണ് അയൽവാശി എത്തുന്നത്. നവാഗതനായ ഇർഷാദ് പരാരി ആണ് അയൽവാശിയുടെ രചനയും സംവിധാനവും. ഫാമിലി കോമഡി എന്റർടയിനർ ആയി ഒരുക്കിയിരിക്കുന്ന ചിത്രം ഏപ്രിൽ 21ന് തിയറ്ററുകളിൽ എത്തും. സൗബിൻ ഷാഹിർ, നിഖില വിമൽ, ബിനു പപ്പു, നസ്ലൻ, ലിജോമോൾ ജോസ്, പാർവതി ബാബു, അജ്മൽ ഖാൻ, ഗോകുലൻ എന്നിവരാണ് ചിത്രത്തിലെ പ്രധാന താരങ്ങൾ.
ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാനാണ് ‘അയൽവാശി’ നിർമിക്കുന്നത്. ഇർഷാദിന്റെ സഹോദരനുമായ മുഹ്‌സിൻ പരാരിയും ചിത്രത്തിന്റെ നിർമാണ പങ്കാളിയാണ്. പൃഥ്വിരാജിന്റെ സഹ സംവിധായകനായി പ്രവർത്തിച്ച ഇർഷാദ് പരാരി ‘ലൂസിഫർ’ എന്ന ചിത്രത്തിന്റെ സംവിധാന സഹായി ആയിരുന്നു.
