‘തന്റെ ആര്യപുത്രന്റെയും അവന്റെ തന്തയുടെയും ചതിക്കഥ ഒരു സിനിമയിൽ ഒന്നും തീരില്ല’; സംഘർഷനിമിഷങ്ങളുമായി തീർപ്പ് ട്രയിലർ എത്തി

പ്രേക്ഷകഹൃദയങ്ങൾ കീഴടക്കിയ കമ്മാരസംഭവം എന്ന ചിത്രത്തിനു ശേഷം മുരളി ഗോപിയും സംവിധായകൻ രതീഷ് അമ്പാട്ടും ഒന്നിക്കുന്ന ചിത്രമാണ് തീർപ്പ്. ചിത്രത്തിന്റെ ട്രയിലർ റിലീസ് ചെയ്തു. ഫ്രൈഡേ ഫിലിം ഹൗസിന്റെ യുട്യൂബ് പേജിലാണ് ട്രയിലർ റിലീസ് ചെയ്തത്. വൻ വരവേൽപ്പാണ് ട്രയിലറിന് ലഭിച്ചിരിക്കുന്നത്. സംഘർഷഭരിതമായ നിമിഷങ്ങളാണ് ട്രയിലറിൽ ഉടനീളം. പൃഥ്വിരാജ് നായകനായി എത്തുന്ന ചിത്രം ഓഗസ്റ്റ് 25ന് തിയറ്ററുകളിലേക്ക് എത്തും. മുരളി ഗോപിയാണ് ചിത്രത്തിന്റെ തിരക്കഥ ഒരുക്കുന്നത്. ‘വിധിതീർപ്പിലും പക തീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക്’, എന്ന ടാഗ്‍ലൈനോടെ എത്തുന്ന ചിത്രത്തിൽ പൃഥ്വിരാജിന് ഒപ്പം ഇന്ദ്രജിത്തും പ്രധാന കഥാപാത്രത്തെ അവതരിപ്പിക്കുന്നുണ്ട്.

സൈജു കുറുപ്പ്, ഇഷ തല്‍വാര്‍, വിജയ് ബാബു, ഹന്ന റെജി കോശി തുടങ്ങിയവരാണ് ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കുന്നത്. മുരളി ഗോപി ആദ്യമായി സംഗീതസംവിധാനം ചെയ്യുന്ന ചിത്രം കൂടിയാണ് ഇത്. സുനിൽ കെ എസ് ഛായാഗ്രഹണം നിർവഹിക്കുന്നു. മുരളി ഗോപി തന്നെയാണ് ഗാനരചനയും സംഗീതസംവിധാനവും.

ഗോപി സുന്ദറാണ് പശ്ചാത്തലസംഗീതം. സമീറ സനീഷ് ആണ് കോസ്റ്റ്യൂം ഡിസൈൻ.വിജയ് ബാബുവിന്റെ ഫ്രൈഡേ ഫിലിം ഹൗസ് ആണ് ചിത്രത്തിന്റെ നിർമ്മാണം. അമ്പതു കോടി ക്ലബിൽ തുടർച്ചയായി ഇടം പിടിച്ച താരമാണ് പൃഥ്വിരാജ്. പൃഥ്വിരാജ് നായകനായി എത്തിയ ജനഗണമനയും കടുവയും അമ്പതു കോടി ക്ലബിൽ ഇടം പിടിച്ചിരുന്നു. കോവിഡ് കാലം കഴിഞ്ഞ് തിയറ്ററുകൾ സജീവമായപ്പോൾ നായകനായി എത്തിയ രണ്ടു ചിത്രവും അമ്പതു കോടി ക്ലബിൽ എത്തിച്ച താരമാണ് പൃഥ്വിരാജ്.