തെന്നിന്ത്യൻ സിനിമാലോകത്ത് കന്നഡ സിനിമയുടെ തലവര തന്നെ മാറ്റിയ ചിത്രമാണ് കെ ജി എഫ്. ചിത്രത്തിന്റെ രണ്ടാം ഭാഗം ഇപ്പോൾ റിലീസിന് ഒരുങ്ങുകയാണ്. ഏപ്രിൽ പതിനാലിന് ആണ് കെ ജി എഫ് രണ്ടാംഭാഗം പ്രേക്ഷകരിലേക്ക് എത്തുക. ചിത്രത്തിലെ ആദ്യ ലിറിക്കൽ വീഡിയോ സോംഗ് ആണ് ഇപ്പോൾ റിലീസ് ചെയ്തിരിക്കുന്നത്. കന്നഡ കൂടാതെ മലയാളം, തമിഴ്. തെലുങ്ക്, ഹിന്ദി ഭാഷകളിലും ചിത്രത്തിലെ ലിറിക്കൽ വീഡിയോ സോംഗ് റിലീസ് ചെയ്തു. ‘തൂഫാൻ’ എന്ന് പേരിട്ടിരിക്കുന്ന ഗാനം സോഷ്യൽ മീഡിയയിൽ ഇപ്പോൾ കൊടുങ്കാറ്റായി മാറിയിരിക്കുകയാണ്.
വൻ സ്വീകരണമാണ് ചിത്രത്തിൽ നിന്നുള്ള ആദ്യഗാനത്തിന് ലഭിച്ചിരിക്കുന്നത്. റോക്കിങ്ങ് സ്റ്റാർ യഷ് ആണ് ചിത്രത്തിൽ നായകനായി എത്തുന്നത്. പ്രശാന്ത് നീൽ ആണ് ചിത്രം സംവിധാനം ചെയ്തിരിക്കുന്നത്. കോലാർ സ്വർണ്ണ ഖനിയുടെ പശ്ചാത്തലത്തിൽ ആണ് കഥ പറയുന്നത്. ഈ ചിത്രം ഹോമബിൾ ഫിലിംസിന്റെ ബാനറിൽ വിജയ് കിരുഗണ്ടുർ ആണ് നിർമ്മിച്ചിരിക്കുന്നത്. ചിത്രത്തിൽ ബോളിവുഡ് സൂപ്പർ താരം സഞ്ജയ് ദത്ത് ആണ് വില്ലനായി എത്തുന്നത്.
കേരളത്തിൽ കെ ജി എഫ് ടു റിലീസ് ചെയ്യുന്നത് പൃഥ്വിരാജ് പ്രൊഡക്ഷൻസ് ആണ്. ചിത്രത്തിന്റെ ഫസ്റ്റ് ലുക്ക് പോസ്റ്റർ, കാരക്ടർ പോസ്റ്ററുകൾ, ആദ്യ ടീസർ, മേക്കിങ് വീഡിയോ എന്നിവ വമ്പൻ ഹിറ്റായി മാറിയിരുന്നു. രവീണ ടണ്ഠൻ, പ്രകാശ് രാജ്, അച്യുത് കുമാർ, ശ്രീനിധി ഷെട്ടി എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. സംഗീതം രവി ബസ്രുറും ചിത്രത്തിന്റെ എഡിറ്റിംഗ് ശ്രീകാന്തും ആണ്. ഭുവൻ ഗൗഡ ആണ് കാമറ. കെ ജി എഫ് ഒന്നാം ഭാഗം ബോക്സ് ഓഫീസിൽ നിന്നും നേടിയത് ഇരുന്നൂറു കോടിക്ക് മുകളിൽ ആണ്.
