എടക്കാട് ബറ്റാലിയന്‍ 06′ എന്ന സിനിമയുടെ ചിത്രീകരണത്തിനിടെ നടന്‍ ടൊവിനോ തോമസിന് പൊള്ളലേറ്റത് വലിയ വാര്‍ത്തയായിരുന്നു. ചിത്രത്തിലെ സംഘട്ടനരംഗം ചിത്രീകരിക്കുന്നതിനിടെയായിരുന്നു അപകടം. നാല് വശത്തുനിന്നും തീ ഉപയോഗിച്ച് ചിത്രീകരിക്കുന്ന രംഗമായിരുന്നു. ഡ്യൂപ്പിനെ ഉപയോഗിക്കാമെന്ന് സംവിധായകന്‍ നിര്‍ബന്ധം പിടിച്ചെങ്കിലും അത് വേണ്ടെന്ന് ടൊവിനോ തീരുമാനിക്കുകയായിരുന്നു. ഇത് സംബന്ധിച്ച് സാമൂഹിക മാധ്യമങ്ങളില്‍ ടൊവിനോക്ക് നേരെ വിമര്‍ശനം ഉയര്‍ന്നിരുന്നു. അന്ന് സംഭവിച്ച കാര്യങ്ങള്‍ എന്താണെന്ന് തുറന്ന് പറയുകയാണ് ടൊവിനോ. മാതൃഭൂമി ക്ലബ് എഫ്.എം ന് നല്‍കിയ അഭിമുഖത്തിലാണ് താരം മനസ്സു തുറന്നത്.
ഒരു ആക്ഷന്‍ സിക്വന്‍സായിരുന്നു. പിറകില്‍ തീയിടും. എസ്.ആര്‍ എന്ന ഗം ഇട്ടാണ് തീ പിടിപ്പിക്കുന്നത്. അത് സിനിമയില്‍ ആവശ്യമായിരുന്നു. എന്നാല്‍ തീ നമ്മുടെ നിയന്ത്രണത്തില്‍ നില്‍ക്കുന്ന ഒരു കാര്യമല്ലല്ലോ. ആളിപ്പടര്‍ന്നു. ഞാന്‍ പെട്ടന്ന് തിരിഞ്ഞപ്പോള്‍ തീ മുഖത്തേക്കും വന്നു. കഴുത്തിന്റെ പിറകിലേക്ക് പടരുന്ന പോലെ തോന്നി. ഇപ്പോള്‍ ചെവിയില്‍ ഒരു പൊള്ളലുണ്ട്, മീശയും പിരികവും കുറച്ച് കരിഞ്ഞു പോയി. എന്തായാലും ഗുരുതരമായി ഒന്നും പറ്റിയില്ല.
എനിക്ക് എന്താണ് സംഭവിക്കുന്നത് എന്ന് മനസ്സിലായില്ല. ഞാന്‍ റിസ്‌ക് എടുക്കണം എന്ന് വിചാരിച്ച് ചെയ്തതല്ല. ആ ഷോട്ടിന് അത് അവശ്യമായിരുന്നു. ആ വീഡിയോയില്‍ കണ്ട അത്ര തന്നെയേ സംഭവിച്ചിട്ടുള്ളൂ. ഞാന്‍ ഇത് സംബന്ധിച്ച് പോസ്റ്റ് ഇട്ടിരുന്നു. ‘അയ്യോ ഒന്നും സംഭവിച്ചില്ലേ’ എന്ന് ചോദിച്ച് കമന്റിട്ടവരും ഉണ്ട്. ഇനി ശ്രമിക്കാം – ചിരിച്ചു കൊണ്ട് ടൊവിനോ പറഞ്ഞു.
