ടൊവിനോ തോമസ് നായകനായി എത്തുന്ന ചിത്രം ‘തല്ലുമാല’ ഇന്ന് തിയറ്ററുകളിലേക്ക് എത്തുകയാണ്. ഖാലിദ് റഹ്മാൻ സംവിധാനം ചെയ്യുന്ന ചിത്രത്തിൽ കല്യാണി പ്രിയദർശനാണ് നായിക. അതേസമയം, പ്രീ-റിലീസ് ബുക്കിംഗിലൂടെ മാത്രം ചിത്രം ഒരുകോടി രൂപ നേടി എന്നാണ് റിപ്പോർട്ടുകൾ. ചിത്രത്തിന്റെ ട്രയിലറിനും പാട്ടിനുമൊക്കെ മികച്ച പ്രതികരണമാണ് ലഭിച്ചത്. ചിത്രത്തിന് ക്ലീൻ യു സർട്ടിഫിക്കറ്റ് ആണ് ലഭിച്ചിരിക്കുന്നത്.
നടൻ ടൊവിനോ തോമസിന്റെ കരിയർ ബെസ്റ്റ് ഓപ്പണിംഗ് ആയിരിക്കും തല്ലുമാലയുടേത് എന്നാണ് ട്രേഡ് അനലിസ്റ്റുകൾ വിലയിരുത്തുന്നത്. മുഹ്സിൻ പെരാരിയും അഷ്റഫ് ഹംസയും ചേർന്നാണ് ചിത്രത്തിന്റെ രചന നിർവഹിച്ചിരിക്കുന്നത്. ആഷിക്ക് ഉസ്മാന്റെ പ്രൊഡക്ഷൻസിന്റെ ബാനറിൽ ആഷിക്ക് ഉസ്മാൻ ആണ് ചിത്രത്തിന്റെ നിർമാണം.
കല്യാണി പ്രിയദർശൻ നായികയായി എത്തുന്ന ചിത്രത്തിൽ ഷൈൻ ടോം ചാക്കോ, ലുക്മാൻ, ചെമ്പൻ വിനോദ് ജോസ്, ജോണി ആന്റണി, ഓസ്റ്റിൻ, അസിം ജമാൽ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിൽ ഇരുപതു വയസുകാരനായ മണവാളൻ വസിം എന്ന കഥാപാത്രമായാണ് ടൊവിനോ എത്തുന്നത്. ബീപാത്തു എന്നാണ് കല്യാണിയുടെ കഥാപാത്രത്തിന്റെ പേര്. തലശ്ശേരി, ദുബായ്, കണ്ണൂരിലെ പരിസരങ്ങൾ എന്നിവിടങ്ങളിലായാണ് സിനിമയുടെ ചിത്രീകരണം നടന്നത്.
