‘വാർമേഘമേ, വാർമേഘമേ ഇവളുടെയുള്ളം നീ കണ്ടുവോ’; ദിലീപും തമന്നയും ഒരുമിക്കുന്ന ബാന്ദ്രയിലെ മനോഹരമായ ഗാനമെത്തി

ജനപ്രിയനായകൻ ദിലീപും തെന്നിന്ത്യൻ താരസുന്ദരി തമന്നയും നായകരായി എത്തുന്ന ചിത്രമാണ് ബാന്ദ്ര. രാമലീല എന്ന ചിത്രത്തിനു ശേഷം ദിലീപിനെ നായകനാക്കി സംവിധായകൻ അരുൺ ഗോപി ഒരുക്കുന്ന ചിത്രമാണ് ഇത്. നവംബർ 10ന് ചിത്രം തിയറ്ററുകളിൽ റിലീസ് ചെയ്യും. ചിത്രത്തിലെ വാർമേഘമേ എന്ന ഗാനവീഡിയോ കഴിഞ്ഞദിവസം റിലീസ് ചെയ്തു. സരീഗമ മലയാളത്തിന്റെ യുട്യൂബ് ചാനലിലൂടെയാണ് വീഡിയോ റിലീസ് ചെയ്തത്. ലക്ഷക്കണക്കിന് ആളുകളാണ് കഴിഞ്ഞദിവസം റിലീസ് ചെയ്ത ഗാനം ഇതുവരെ കണ്ടത്. നേരത്തെ റിലീസ് ചെയ്ത റക്ക റക്ക ഗാനം സോഷ്യൽ മീഡിയയിൽ വൈറലായിരുന്നു. സന്തോഷ് വർമയുടെ വരികൾക്ക് സാം സി എസ് ആണ് സംഗീതം നൽകിയിരിക്കുന്നത്. ശ്വേത മോഹനും കപിൽ കപിലനും ചേർന്നാണ് ഗാനം ആലപിച്ചിരിക്കുന്നത്.

മാസ്സ് ഗെറ്റപ്പിൽ ദിലീപ് എത്തുന്ന ചിത്രത്തിൽ തെന്നിന്ത്യൻ താരസുന്ദരി തമന്ന ആണ് നായികയായി എത്തുന്നത്. അജിത് വിനായക ഫിലിംസിന്റെ ബാനറിൽ വിനായക അജിത് നിർമിക്കുന്ന ചിത്രത്തിന് ഉദയകൃഷ്ണയാണ് തിരക്കഥ ഒരുക്കുന്നത്. നേരത്തെ റിലീസ് ചെയ്ത ടീസർ സോഷ്യൽ മീഡിയയിൽ വൈറലായിരുന്നു. തമന്നയുടെ ആദ്യ മലയാള സിനിമയാണെന്ന പ്രത്യേകതയും ബാന്ദ്രയ്ക്കുണ്ട്. തമന്നയുടെ മലയാളത്തിലേക്കുള്ള വരവ് പുതിയ വീഡിയോ സോംഗിന്റെ റിലീസോടെ ആരാധകർ ആഘോഷമാക്കുകയാണ്. തമിഴ് നടൻ ശരത് കുമാറും ബോളിവുഡ് നടൻ ദിനോ മോറിയയും ചിത്രത്തിലുണ്ട്. സിദ്ദിഖ്, കലാഭവൻ ഷാജോൺ, ഗണേഷ് കുമാർ തുടങ്ങി വമ്പൻ താരനിരയാണ് ചിത്രത്തിൽ അണി നിരക്കുന്നത്.

ദിലീപിന്റെ കരിയറിലെ 147-ാം സിനിമയാണിത്. അഹമ്മദാബാദ്, സിദ്ധാപൂർ, രാജ്കോട്ട്, ഘോണ്ടൽ, ജയ്പൂർ, മുംബൈ, ഹൈദരാബാദ് തുടങ്ങിയ ഇടങ്ങളിലായിട്ടായിരുന്നു ചിത്രത്തിന്റെ ഷൂട്ടിങ്ങ്. ഷാജി കുമാറാണ് ഛായാഗ്രഹണം. സംഗീതം – സാം സി എസ്, എഡിറ്റിംഗ് – വിവേക് ഹര്‍ഷന്‍, കലാസംവിധാനം – സുബാഷ് കരുണ്‍, സൗണ്ട് ഡിസൈന്‍ – രംഗനാഥ് രവി, വസ്ത്രാലങ്കാരം – പ്രവീണ്‍ വര്‍മ്മ. ആക്ഷൻ രംഗങ്ങൾക്ക് ഏറെ പ്രാധാന്യമുള്ള ചിത്രത്തിൽ മൂന്ന് പേർ ചേർന്നാണ് സംഘട്ടനങ്ങൾ ഒരുക്കുന്നത്. അൻബറിവ്, ഫിനിക്സ് പ്രഭു, മാഫിയ ശശി എന്നിവരാണ് ആക്ഷൻ കോറിയോഗ്രാഫർമാർ. പി ആർ ഒ – ശബരി.