ആരാധകരെയാകെ ഞെട്ടിച്ചു കൊണ്ടാണ് തെന്നിന്ത്യന്‍ താരങ്ങളായ സാമന്തയും നാഗചൈതന്യയും വിവാഹമോചന വാര്‍ത്ത പുറത്തു വിട്ടത്. ഏറെ നാളത്തെ അഭ്യൂഹങ്ങള്‍ക്കൊടുവിലായിരുന്നു താരങ്ങള്‍ ഇക്കാര്യം സ്ഥിരീകരിച്ചത്. പിന്നാലെ സാമന്തക്ക് നേരെ നിരവധി വ്യാജപ്രചരണങ്ങള്‍ ഉയരുകയും ഇതില്‍ പ്രതികരണവുമായി താരം രംഗത്തെത്തുകയും ചെയ്തിരുന്നു. ഇപ്പോഴിതാ സാമന്തയ്ക്ക് പിന്തുണയുമായി എത്തിയിരിക്കുകയാണ് നടി വനിത വിജയകുമാര്‍.
‘സമൂഹം എന്നൊന്നില്ല, നിന്റെ ജീവിതം ജീവിക്കൂ, ആളുകള്‍ നമ്മള്‍ പകര്‍ത്തുന്ന ചിത്രങ്ങളേ കാണൂ, വീഡിയോ വ്യത്യസ്തമായിരിക്കും. ജീവിതം വളരെ അമൂല്യമാണ്, അതിനെക്കുറിച്ച് ആശങ്കപ്പെട്ട് നഷ്ടപ്പെടുത്തേണ്ടതല്ല. എന്തിനും ഒരു കാരണമുണ്ട്. മുന്നോട്ട് പോവുക. നിങ്ങള്‍ക്ക് എല്ലാ കരുത്തും ആശംസിക്കുന്നു’എന്നാണ് വനിത സോഷ്യല്‍ മീഡിയയില്‍ പങ്കുവെച്ച കുറിപ്പ്.
നാലു വര്‍ഷങ്ങള്‍ക്കു മുമ്പ് 2017ലായിരുന്നു സാമന്ത- നാഗചൈതന്യ വിവാഹം. പരസ്പര സമ്മതത്തോടെയാണ് ഇരുവരും വേര്‍പിരിഞ്ഞത്. ഒരുപാട് ആലോചനകള്‍ക്കു ശേഷമാണ് വിവാഹമോചനമെന്ന തീരുമാനത്തില്‍ എത്തിയതെന്നും തങ്ങളുടെ സ്വകാര്യതയെ മാനിക്കണമെന്നും സാമന്തയും നാഗചൈതന്യയും നേരത്തേ അഭ്യര്‍ഥിച്ചിരുന്നു. ഇതിനിടെ സാമന്തയ്‌ക്കെതിരേ വിമര്‍ശനങ്ങള്‍ ഉയര്‍ന്നിരുന്നു.
