റോളുകൾ തിരഞ്ഞെടുക്കുന്ന കാര്യത്തിൽ സെലക്റ്റീവ് ആയതുകൊണ്ട് തന്നെയാണ് വിജയ് സേതുപതി എന്ന നടനെ മക്കൾ സെൽവൻ ആക്കി തീർത്തത്. സ്വന്തം അധ്വാനം കൊണ്ട് വിജയത്തിന്റെ പടവുകൾ നടന്നുകയറിയ ഈ താരം ഇപ്പോൾ സ്വപ്ന തുല്യമായ ഉയരങ്ങളിലാണ്. ലോകേഷ് കനകരാജ് ഒരുക്കുന്ന വിജയ് ചിത്രത്തിലും ഒരു ഗംഭീര റോളാണ് അദ്ദേഹത്തിനുള്ളത് എന്നാണ് അറിയാൻ കഴിയുന്നത്.
ഇപ്പോൾ വരുന്ന പുതിയ റിപ്പോർട്ടുകൾ അനുസരിച്ച് അല്ലു അർജുൻ നായകനാകുന്ന പുതിയ ചിത്രത്തിൽ വിജയ് സേതുപതി വില്ലനായി എത്തുന്നു എന്നാണ് അറിയാൻ കഴിയുന്നത്. ചിരഞ്ജീവി നായകനായ ബ്രഹ്മാണ്ഡ ചിത്രം സെയ്‌റ നരസിംഹ റെഡ്ഢിയിലെ കഥാപാത്രത്തോട് കൂടി നിരവധി ഓഫറുകളാണ് വിജയ് സേതുപതിക്ക് തെലുങ്കിൽ നിന്നും ലഭിച്ചു കൊണ്ടിരിക്കുന്നത്. സുകുമാർ സംവിധാനം നിർവഹിക്കുന്ന അല്ലു അർജുൻ ചിത്രം റായൽസീമ, നെല്ലൂർ എന്നിവിടങ്ങളിലെ റെഡ് സാൻഡ് കള്ളക്കടത്തുക്കാരുടെ കഥയാണ് പറയുന്നത്. ഡിസംബർ അവസാനത്തോടെ ഷൂട്ടിംഗ് ആരംഭിക്കുമെന്നാണ് റിപ്പോർട്ട്.
