വിജയ് നായകനായി എത്തുന്ന ബീസ്റ്റ് എന്ന ചിത്രത്തിന്റെ റിലീസ് തീയതി പ്രഖ്യാപിച്ചു. ഏപ്രില്‍ പതിമൂന്നിനാണ് ചിത്രം തീയറ്ററുകളിലെത്തുക. കന്നഡയിലെ ബ്രഹ്‌മാണ്ഡ ചിത്രം കെജിഎഫ് 2 റിലീസ് ചെയ്യുന്നത് ഏപ്രില്‍ പതിനാലിനാണ്. തൊട്ടടുത്ത ദിവസങ്ങളില്‍ രണ്ട് വമ്പന്‍ ചിത്രങ്ങളുടെ ക്ലാഷ് റിലീസില്‍ ആരാധകരും ആവേശത്തിലാണ്.
മാസ്റ്ററിന് ശേഷം വിജയ് നായകനായി എത്തുന്ന ചിത്രമാണ് ബീസ്റ്റ്. സെല്‍സണ്‍ ദിലീപ് കുമാറാണ് ചിത്രം സംവിധാനം ചെയ്തിരിക്കുന്നത്. ചിത്രത്തിലെ അറബിക് കുത്ത് ഗാനം ഇതിനോടകം തന്നെ പ്രേക്ഷക ഹൃദയങ്ങള്‍ കീഴടക്കിയിരുന്നു. ഏറെ പ്രതീക്ഷയോടെയാണ് ചിത്രത്തെ പ്രേക്ഷകര്‍ കാത്തിരിക്കുന്നത്. വിജയിയുടെ സിനിമാ കരിയറിലെ 65-ാമത്തെ ചിത്രമാണ് ബീസ്റ്റ്. അതുകൊണ്ടു തന്നെ ദളപതി 65 എന്നാണ് ചിത്രം അറിയപ്പെടുന്നത്. മലയാളത്തില്‍ നിന്ന് ഷൈന്‍ ടോം ചാക്കോ അപര്‍ണ ദാസ് എന്നിവരും ചിത്രത്തില്‍ വേഷമിടുന്നുണ്ട്.
പ്രശാന്ത് നീല്‍ തന്നെയാണ് കെജിഎഫ് 2 ഉം ഒരുക്കിയിരിക്കുന്നത്. ചിത്രവും പ്രേക്ഷകര്‍ ആവേശത്തോടെയാണ് കാത്തിരിക്കുന്നത്. കന്നഡയ്ക്ക് പുറമേ മലയാളം, ഹിന്ദി, തമിഴ്, തെലുങ്ക് ഭാഷകളിലും കെജിഎഫ് 2 പ്രേക്ഷകരിലെത്തും, സഞ്ജയ് ദത്ത്, പ്രകാശ് രാജ്, രവീണ ടണ്ഠന്‍, ശ്രീനിഥി ഷെട്ടി, മാളവിക അവിനാശ് തുടങ്ങി വന്‍ താരനിരയാണ് ചിത്രത്തിലുള്ളത്.
