കമല്‍ഹാസന്‍ നായകനായി എത്തിയ വിക്രത്തില്‍ പ്രേക്ഷകരെ ത്രസിപ്പിച്ച കഥാപാത്രങ്ങളില്‍ ഒന്നായിരുന്നു ഏജന്റ് ടീസ. വര്‍ഷങ്ങളായി നൃത്തരംഗത്ത് സജീവമായിട്ടുള്ള വാസന്തിയാണ് ടീനയായി സ്‌ക്രീനില്‍ നിറഞ്ഞത്. ഇപ്പോഴിതാ വാസന്തി മമ്മൂട്ടിക്കൊപ്പം സ്‌ക്രീന്‍ പങ്കിടാന്‍ പോകുന്നുവെന്ന വാര്‍ത്തയാണ് പുറത്തുവരുന്നത്. ബി. ഉണ്ണികൃഷ്ണന്‍ സംവിധാനം ചെയ്യുന്ന ത്രില്ലര്‍ ചിത്രത്തിലാണ് വാസന്തി വേഷമിടുക. പ്രധാനവേഷത്തിലാകും വാസന്തി എത്തുകയെന്നാണ് വിവരം.
ഗ്രാന്‍ഡ് മാസ്റ്ററിന് ശേഷം ബി ഉണ്ണികൃഷ്ണന്‍ ഒരുക്കുന്ന ത്രില്ലര്‍ ചിത്രത്തില്‍ പൊലീസ് ഉദ്യോഗസ്ഥനായാണ് മമ്മൂട്ടി എത്തുന്നത്. സ്‌നേഹ, അമല പോള്‍, ഐശ്വര്യ ലക്ഷ്മി എന്നിവരാണ് നായികമാര്‍. വിനയ് റായ് ആണ് ചിത്രത്തില്‍ വില്ലന്‍ കഥാപാത്രത്തെ അവതരിപ്പിക്കുന്നത്. ഷൈന്‍ ടോം ചാക്കോ, ദിലീഷ് പോത്തന്‍, സിദ്ദിഖ്, ജിനു എബ്രഹാം എന്നിവരാണ് ചിത്രത്തിലെ മറ്റ് താരങ്ങള്‍.
ഓപ്പറേഷന്‍ ജാന ഒരുക്കിയ ഫൈസ് സിദ്ദിഖാണ് ചിത്രത്തിന്റെ ഛായാഗ്രാഹകന്‍. ജസ്റ്റിന്‍ വര്‍ഗീസാണ് സംഗീതം.മനോജാണ് എഡിറ്റിംഗ് നിര്‍വഹിക്കുന്നത്. കലാസംവിധാനം ഷാജി നടുവിലും വസ്ത്രാലങ്കാരം പ്രവീണ്‍വര്‍മയും ചമയം പൊയ്യയും കൈകാര്യം ചെയ്യുന്നു. അരോമ മോഹന്‍ ആണ് ചിത്രം നിര്‍മിക്കുന്നത്.
