കൊച്ചി കോർപ്പറേഷൻ പിരിച്ചുവിടണം, ഇനി നികത്താൻ ബാക്കിയുള്ളത് കൊച്ചി കായൽ മാത്രം;രൂക്ഷ വിമർശനവുമായി നടൻ വിനായകൻ

കൊച്ചി കോർപ്പറേഷനെതിരെ രൂക്ഷമായ വിമർശനവുമായി രംഗത്തെത്തിയിരിക്കുകയാണ് നടൻ വിനായകൻ. ഒരു പ്രമുഖ മാധ്യമത്തിന് നൽകിയ അഭിമുഖത്തിലാണ് അദ്ദേഹം വിമർശനവുമായി എത്തിയത്. കനത്ത വെള്ളക്കെട്ടിൽ കൊച്ചി നഗരം മുങ്ങിയപ്പോൾ എല്ലാ ദുരിതങ്ങൾക്കും വേലിയേറ്റത്തെ കുറ്റം പറഞ്ഞ കൊച്ചി കോർപ്പറേഷൻ പിരിച്ചു വിടണം എന്നാണ് താരം പറയുന്നത്. ആദ്യം അവർ മറൈൻഡ്രൈവ് ഉണ്ടാക്കിയെന്നും പിന്നീട് ആർക്കോവേണ്ടി മറൈൻ വാക് ഉണ്ടാക്കിയെന്നും ഇനി മിച്ചമുള്ളത് കൊച്ചി കായൽ മാത്രമാണ് അതുകൂടി വേഗത്തിൽ നികത്തണമെന്നും അദ്ദേഹം പറയുന്നുണ്ട്.

ഒട്ടും വിദ്യാഭ്യാസമില്ലാത്ത തനിക്ക് പോലും ഇതിലെ പൊള്ളത്തരം മനസ്സിലാകുന്നുണ്ടെന്നും എന്നാൽ വിദ്യാഭ്യാസമുള്ള ഇവർ എന്താണ് ഇങ്ങനെ ചെയ്യുന്നതെന്നും വിനായകൻ ചോദിക്കുന്നു. കൊച്ചിയിലെ വെള്ളക്കെട്ട് വേലിയേറ്റം കൊണ്ടാണെന്ന് ഹൈക്കോടതിയിൽ പറഞ്ഞ കോർപ്പറേഷനെ രൂക്ഷമായ ഭാഷയിൽ വിമർശിക്കുകയാണ് വിനായകൻ. എല്ലാ ഫണ്ടുകളും കോർപ്പറേഷനും മറ്റ് സ്ഥാപനങ്ങളും കട്ടുമുടിച്ചു തീർക്കുകയാണ് എന്നും ഇനിയും ജനങ്ങളും നോക്കിയിരിക്കില്ല എന്നും ജനങ്ങൾ ഇറങ്ങുമെന്നും അദ്ദേഹം പറയുന്നു.