പ്രേക്ഷകർക്ക് ഏറെ പ്രിയപ്പെട്ട സിനിമയാണ് വിനീത് ശ്രീനിവാസൻ സംവിധാനം ചെയ്ത ഹൃദയം. ചിത്രത്തിൽ പ്രണവ് മോഹൻലാലിന്റെ കഥാപാത്രമായ അരുൺ നീലകണ്ഠനും അയാളുടെ അച്ഛൻ വേഷം ചെയ്ത വിജയരാഘവനും കെട്ടിപ്പിടിക്കുന്ന ഒരു രംഗമുണ്ട്. ആ രംഗത്തെക്കുറിച്ച് വാചാലനാകുകയാണ് വിനീത് ശ്രീവനിവാസൻ. ആ രംഗത്തിന് ശേഷമാണ് പ്രണവ് നായക കഥാപാത്രത്തിലേക്ക് എത്തിയതെന്നും ആ കെട്ടിപ്പിടുത്തത്തിൽ നിന്ന് അരുൺ നീലകണ്ഠൻ എന്നയാൾ എമർജ് ചെയ്തതു പോലെ തനിക്ക് തോന്നിയെന്നും വിനീത് പറഞ്ഞു. ജിഞ്ചർ മീഡിയ എന്റർടയിൻമെന്റ്സിന് നൽകിയ അഭിമുഖത്തിലാണ് വിനീത് ഇങ്ങനെ പറഞ്ഞത്. ഷൂട്ട് തുടങ്ങിയ ദിവസങ്ങളിലാണ് ആ രംഗം എടുത്തതെന്നും അതുകൊണ്ടുണ്ടായ ഒരു ഗുണം അവിടെ വെച്ചാണ് അപ്പൂനെ ആ കഥാപാത്രമായി കിട്ടിയതെന്നും വിനീത് പറഞ്ഞു.
ആ കെട്ടിപ്പിടുത്തത്തിൽ ഒരു ഐസ് ബ്രേക്കിംഗ് നടന്നു. എന്താണ് നടന്നതെന്ന് അവർക്ക് മാത്രമേ അറിയാൻ പറ്റുകയുള്ളൂവെന്നും ആ കെട്ടിപ്പിടുത്തത്തിൽ നിന്നും അരുൺ നീലകണ്ഠൻ എന്നയാൾ എമർജ് ചെയ്തതു പോലെ തനിക്ക് തോന്നിയെന്നും വിനീത് പറഞ്ഞു. അതു കഴിഞ്ഞ് ഷൂട്ട് ചെയ്ത സീനിലൊക്കെ അപ്പു പെർഫോം ചെയ്തത് വേറൊരു എനർജിയിൽ ആയിരുന്നെന്നും വിനീത് വ്യക്തമാക്കി. അച്ഛനും മക്കളും തമ്മിലുള്ളത് വേറൊരു റിലേഷൻഷിപ്പ് ആണെന്നും സ്നേഹമുണ്ടോ എന്ന് ചോദിച്ചാൽ ഉണ്ടെന്നും ഭയങ്കരമായി അടുക്കാൻ പറ്റുമോ എന്ന് ചോദിച്ചാൽ അതുമില്ലെന്നും അങ്ങനെ കുഴഞ്ഞുമറിഞ്ഞു കിടക്കുന്ന ഒരു റിലേഷനാണെന്നും പല ആളുകൾക്കും പല രീതിയിൽ അത് കണക്ട് ആയിട്ടുണ്ടെന്നും വിനീത് പറഞ്ഞു.
അച്ഛൻ ശ്രീനിവാസനെക്കുറിച്ചും വിനീത് മനസു തുറന്നു. തന്റെ ചെറുപ്പത്തിൽ അച്ഛൻ മദ്യപിച്ചിട്ടുണ്ടെങ്കിൽ കെട്ടിപ്പിടിക്കുമെന്നും മദ്യപിച്ചിട്ടില്ലെങ്കിൽ പാട്ട് കേട്ടിട്ട് പോകുമെന്നും വിനീത് പറഞ്ഞു. അതുകൊണ്ട് ചെറുപ്പത്തിൽ അച്ഛൻ ഒന്നു രണ്ടെണ്ണം കഴിക്കുന്നത് ഇഷ്ടമായിരുന്നെന്നും അപ്പോഴേ അച്ഛൻ സ്നേഹം എക്സ് പ്രസ് ചെയ്യുകയുള്ളൂവെന്നും എന്നാൽ അധികാമായാൽ ബോറാണെന്നും വിനീത് ഓർത്തു. എന്നാൽ ഇപ്പോഴാണെങ്കിൽ അത് ചിന്തിക്കാൻ പറ്റില്ലെന്നും വിനീത് വ്യക്തമാക്കി.
