‘വേറിട്ട കാഴ്ചകള്‍ക്ക് കാത്തിരിക്കുന്നു; പുത്തന്‍ പരീക്ഷണങ്ങള്‍ക്ക് സല്യൂട്ട്’; പ്രതീക്ഷ വാനോളമുയര്‍ത്തി മഹാവീര്യര്‍

എബ്രിഡ് ഷൈന്‍, നിവിന്‍ പോളി, ആസിഫ് അലി കൂട്ടുകെട്ടില്‍ ഒരുങ്ങിയ മഹാവീര്യര്‍ പ്രേക്ഷകരിലേക്ക് എത്തുകയാണ്. ജൂലൈ 21നാണ് ചിത്രത്തിന്റെ റിലീസ് തീരുമാനിച്ചിരിക്കുന്നത്. കഴിഞ്ഞ ദിവസം പുറത്തിറങ്ങിയ ചിത്രത്തിന്റെ ട്രെയിലറിന് മികച്ച പ്രതികരണമാണ് ലഭിച്ചിരിക്കുന്നത്. വെള്ളിയാഴ്ച പുറത്തിറങ്ങിയ ട്രെയിലര്‍ ഇതുവരെ 32 ലക്ഷത്തിലധികം പേര്‍ കണ്ടു. ചിത്രത്തിനുള്ള കാത്തിരിപ്പിലാണ് പ്രേക്ഷകരെന്ന് ട്രെയിലറിന് താഴെ വന്നിരിക്കുന്ന കമന്റുകളില്‍ നിന്ന് വ്യക്തം.

‘വേറിട്ട കാഴ്ചകള്‍ക്ക് കാത്തിരിക്കുന്നു, പുത്തന്‍ പരീക്ഷണങ്ങള്‍ക്ക് സല്യൂട്ട്’ എന്നാണ് ഒരാള്‍ കമന്റ് ചെയ്തിരിക്കുന്നത്. എബ്രിഡ് ഷൈന്‍ ചിത്രത്തിനും ആസിഫ്, നിവിന്‍ പോളി കോമ്പോയ്ക്കും കാത്തിരിക്കുന്നവരുണ്ട്. മലയാള സിനിമ ഇന്‍ഡസ്ട്രിയില്‍ വേറിട്ട ഒരു ദൃശ്യ വിരുന്നാകും ചിത്രമെന്നാണ് മറ്റൊരാള്‍ അഭിപ്രായപ്പെട്ടത്. ചിത്രം തീയറ്ററില്‍ തന്നെ കാണാന്‍ കാത്തിരിക്കുന്നവരും കമന്റിട്ടവരുടെ കൂട്ടത്തിലുണ്ട്.

പോളി ജൂനിയര്‍ പിക്ചേഴ്സ്, ഇന്ത്യന്‍ മൂവി മേക്കേഴ്സ് എന്നീ ബാനറുകളില്‍ നിവിന്‍ പോളി, പി. എസ് ഷംനാസ് എന്നിവര്‍ ചേര്‍ന്നാണ് ചിത്രം നിര്‍മിച്ചിരിക്കുന്നത്. നിവിന്‍ പോളി, ആസിഫ് അലി എന്നിവരെ കൂടാതെ ലാല്‍, ലാലു അലക്സ്, സിദ്ധിഖ്, ഷാന്‍വി ശ്രീവാസ്തവ, വിജയ് മേനോന്‍, മേജര്‍ രവി, മല്ലിക സുകുമാരന്‍, സുധീര്‍ കരമന, കൃഷ്ണ പ്രസാദ്, പദ്മരാജന്‍ രതീഷ്, സുധീര്‍ പറവൂര്‍, കലാഭവന്‍ പ്രജോദ്, പ്രമോദ് വെളിയനാട്, ഷൈലജ പി അമ്പു എന്നിവരും മുഖ്യവേഷത്തിലെത്തുന്നു. എം. മുകുന്ദന്റെ കഥയെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. ചിത്രത്തിന്റെ തിരക്കഥയൊരുക്കിയിരിക്കുന്നത് എബ്രിഡ് ഷൈനാണ്.

സംസ്ഥാന അവാര്‍ഡ് ജേതാവായ ചന്ദ്രു സെല്‍വരാജാണ് ചിത്രത്തിന്റെ ഛായാഗ്രഹണം നിര്‍വഹിച്ചിരിക്കുന്നത്. ഇഷാന്‍ ചാബ്ര സംഗീതവും പശ്ചാത്തല സംഗീതവും ഒരുക്കിയിരിക്കുന്നു. മനോജാണ് ചിത്രസംയോജനം നിര്‍വഹിച്ചത്. ശബ്ദ മിശ്രണം-വിഷ്ണു ഗോവിന്ദ്, ശ്രീ ശങ്കര്‍, കലാ സംവിധാനം അനീസ് നാടോടി, വസ്ത്രാലങ്കാരം ചന്ദ്രകാന്ത്, മെല്‍വി. ജെ, ചമയം ലിബിന്‍ മോഹനന്‍, മുഖ്യ സഹ സംവിധാനം-ബേബി പണിക്കര്‍ എന്നിവരും ചേര്‍ന്ന് നിര്‍വഹിച്ചിരിക്കുന്നു.