പ്രണയവും പ്രതികാരവും സസ്പെന്‍സും നിറഞ്ഞ ഒരു കഥ ഉദ്വേഗം ജനിപ്പിക്കുന്ന രീതിയില്‍ പറഞ്ഞിരിക്കുന്ന സിനിമ ആണ് ട്രൂ സോള്‍ പിക്ചേഴ്സിന്റെ ബാനറില്‍ രൂപേഷ് കുമാര്‍ നിര്‍മിച്ചു ഡാവിഞ്ചി ശരവണന്‍ രചന, സംവിധാനം നിര്‍വഹിച്ച ‘വീ ‘. തമിഴ് ചിത്രം മികച്ച പ്രതികരണം നേടി കേരളത്തില്‍ രണ്ടാം വാരത്തിലേക്ക് മുന്നേറുന്നു.
പ്രേക്ഷകരെ മുള്‍മുനയില്‍ നിര്‍ത്തുന്ന ഒരു മിസ്റ്ററി സസ്പെന്‍സ് ത്രില്ലറാണ് ‘വീ’. വാരാന്ത്യം ആഘോഷിക്കാനായി ബാംഗ്ലൂരില്‍നിന്നും പുറപ്പെടുന്ന അഞ്ച് ആണ്‍കുട്ടികളും അഞ്ച് പെണ്‍കുട്ടികളുമടങ്ങുന്ന സംഘം നേരിടുന്ന ഉദ്വേഗജനകമായ സംഭവങ്ങളാണ് ചിത്രത്തിന്റെ കഥ. പ്രണയവും തമാശയുമൊക്കെയായി നീങ്ങുന്ന യാത്രക്കിടെ സംഘത്തിലൊരാള്‍ പുതിയൊരു ആപ്പിനെപ്പറ്റി പറയുന്നു. ജനന തീയതി നല്‍കിയാല്‍ മരണ ദിവസം അറിയാന്‍ കഴിയുമെന്നതാണ് ആപ്പിന്റെ പ്രത്യേകത. ഇത് സത്യമാണോ എന്നറിയാന്‍ അവര്‍ക്ക് പരിചയമുള്ള മരിച്ചുപോയ ചിലരുടെ ജനന തീയതി നല്‍കി പരിശോധിക്കുന്നു. ആപ്പിന്റെ പ്രവര്‍ത്തനത്തില്‍ കൗതുകം തോന്നിയ അവര്‍ യാത്രയിലുള്ള പത്ത് പേരുടെയും ജനന തീയതി നല്‍കി നോക്കുന്നു.
അപ്പോള്‍ അവര്‍ യാത്ര ചെയ്യുന്ന അതേ ദിവസം തന്നെ അവരുടെ മരണ തീയതിയായി കാണുന്നു. യാത്രക്കിടെ ഉള്‍ക്കാട്ടിലെ ഒരു റിസോര്‍ട്ടില്‍ എത്തിച്ചേരുന്ന സംഘം നേരിടുന്ന ഭീതിജനകമായ അനുഭവങ്ങളാണ് പ്രേക്ഷകരെ ശ്വാസം പിടിച്ചിരുത്തുംവിധം ചിത്രത്തില്‍ പറയുന്നത്. ട്രൂ സോള്‍ പിക്ചേഴ്സിന്റെ ബാനറില്‍ രൂപേഷ് കുമാര്‍ നിര്‍മിച്ച വീ ധാരപുരം, കൊച്ചി, അട്ടപ്പാടി, എന്നിവിടങ്ങളിലാണ് ചിത്രീകരിച്ചത്. രാഘവ്, ലതിയ, സബിത ആനന്ദ്, ആര്‍.എന്‍.ആര്‍ മനോഹര്‍, റിഷി, അശ്വനി, നിമ, സത്യദാസ്, ഫിജിയ, റിനീഷ്, ദിവ്യന്‍, ദേവസൂര്യ എന്നിവരാണ് ചിത്രത്തില്‍ പ്രധാന വേഷങ്ങളില്‍ എത്തുന്നത്.
