സൂപ്പർ ഹിറ്റ് സൂപ്പർ ഹീറോ ചിത്രമായ മിന്നൽ മുരളിക്ക് ശേഷം അടുത്ത പ്രൊജക്ടുമായി വീക്കെൻഡ് ബ്ലോക്ക്ബസ്റ്റേഴ്സ്. നിർമാതാവായ സോഫിയ പോൾ ആണ് ഇക്കാര്യം സോഷ്യൽ മീഡിയയിലൂടെ അറിയിച്ചത്. കെ ജി എഫ്, വിക്രം, ബീസ്റ്റ് തുടങ്ങിയ ഹിറ്റ് ചിത്രങ്ങളുടെ ആക്ഷൻ ഡയറക്ടർമാരായ ‘അൻബറിവ്‌’ എന്നിവർക്ക് ഒപ്പമുള്ള ചിത്രം പങ്കുവെച്ചാണ് സോഫിയ പോൾ ഇക്കാര്യം അറിയിച്ചത്. ‘ആവേശം പകരുന്ന മറ്റൊരു വർക്ക് ഉടൻ വരുന്നു’ എന്നാണ് സോഫിയ പോൾ ചിത്രത്തിന് ഒപ്പം കുറിച്ചത്.
View this post on Instagram
മിന്നൽ മുരളി കൂടാതെ പ്രേക്ഷകർക്ക് ഇഷ്ടപ്പെട്ട ഒരുപിടി മികച്ച ചിത്രങ്ങൾ സമ്മാനിച്ച പ്രൊഡക്ഷൻ കമ്പനിയാണ് വീക്കെൻഡ് ബ്ലോക്ക്ബസ്റ്റേഴ്സ്. ബാംഗ്ലൂർ ഡേയ്‌സ്, കാട് പൂക്കുന്ന നേരം, മുന്തിരി വള്ളികൾ തളിർക്കുമ്പോൾ, പടയോട്ടം എന്നിവയാണ് മിന്നൽ മുരളി കൂടാതെ വീക്കെൻഡ് ബ്ലോക്ക് ബസ്റ്റേഴ്സ് ഒരുക്കിയ ചിത്രങ്ങൾ. അടുത്ത ചിത്രത്തിന്റെ വിശേഷങ്ങൾ പങ്കുവെച്ചതിൽ നിന്ന് അടുത്ത പ്രൊജക്റ്റ് ആക്ഷൻ പ്രാധാന്യമുള്ള ഒന്നാണെന്ന് എന്നാണ് സൂചനകൾ.
ഏതായാലും സിനിമ പ്രേമികൾക്കിടയിൽ വലിയ ആവേശമാണ് ഈ വാർത്ത സൃഷ്ടിച്ചിരിക്കുന്നത്. മിന്നൽ മുരളി ആയിരുന്നു വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ അവസാനമായി എത്തിയ സിനിമ. ഒടിടി റിലീസ് ആയി എത്തിയ ചിത്രം വൻവിജയമായിരുന്നു നേടിയത്. ബേസിൽ ജോസഫ് സംവിധാനം ചെയ്ത ചിത്രത്തിൽ ടോവിനോ തോമസ്, ഗുരു സോമസുന്ദരം എന്നിവർ ആയിരുന്നു പ്രധാന കഥാപാത്രങ്ങളെ അവതരിപ്പിച്ചത്. ചിത്രത്തിലെ ഗാനങ്ങളും രംഗങ്ങളും എല്ലാം പ്രേക്ഷകർക്കിടയിൽ വൻ സ്വീകാര്യത ആയിരുന്നു നേടിയത്.
