കുമ്പളങ്ങി നൈറ്റ്സ് എന്ന ചിത്രത്തിലൂടെ അഭിനയരംഗത്തേക്ക് എത്തിയ പ്രതിഭയാണ് മാത്യു തോമസ്. പിന്നീട് കൗമാര പ്രണയങ്ങളുടെ കഥ പറഞ്ഞ തണ്ണീർമത്തൻ ദിനങ്ങൾ എന്ന സിനിമയിൽ ഒരു പ്രധാന വേഷത്തിൽ മാത്യു അഭിനയിച്ചു. ഇപ്പോൾ ഇതാ ദളപതി 67ൽ ഒരു പ്രധാനപ്പെട്ട വേഷത്തിൽ മാത്യു തോമസും അഭിനയിക്കുന്നു എന്ന വാർത്തയാണ് ഇപ്പോൾ പുറത്തു വരുന്നത്. തമിഴ് സൂപ്പർ താരം വിജയിയും ലോകേഷ് കനകരാജും ഒരുമിക്കുന്ന ചിത്രത്തിൽ മാത്യു തോമസും ഒരു പ്രധാനവേഷത്തിൽ എത്തുന്നെന്നാണ് റിപ്പോർട്ടുകൾ.
ചിത്രത്തിന്റെ ഷൂട്ടിംഗ് ഡിസംബർ ഒന്നിന് മൂന്നാറിൽ ആരംഭിക്കും. ഡിസംബർ 15ന് മാത്യു തോമസ് ജോയിൻ ചെയ്യും എന്നാണ് റിപ്പോർട്ടുകൾ. അഞ്ചാം പാതിര, ഓപ്പറേഷൻ ജാവ, വൺ, പ്രകാശൻ പറക്കട്ടെ, ജോ ആൻഡ് ജോ, വിശുദ്ധ മെജോ എന്നിവയാണ് മാത്യുവിന്റെ മറ്റ് ചിത്രങ്ങൾ.
അതേസമയം, ദളപതി 67ൽ സംവിധായകൻ മിഷ്‍കിനും ഒരു പ്രധാന വേഷത്തിൽ എത്തുന്നുണ്ട്. തൃഷ കൃഷ്‍ണൻ ആയിരിക്കും ചിത്രത്തിലെ നായിക എന്ന് നേരത്തെ റിപ്പോര്‍ട്ട് ഉണ്ടായിരുന്നു. ചിത്രത്തിന്റെ ഔദ്യോഗിക പ്രഖ്യാപനം വൈകാതെയുണ്ടാകും. അനിരുദ്ധ് രവിചന്ദെര്‍ ആണ് ചിത്രത്തിന്റെ സംഗീത സംവിധാനം. ബോളിവുഡ് താരം സഞ്‍ജയ് ദത്ത് ചിത്രത്തില്‍ വില്ലനായി അഭിനയിക്കുമെന്ന വാര്‍ത്തകളും പ്രചരിച്ചിരുന്നു. ആക്ഷൻ കിംഗ് അര്‍ജുനും ചിത്രത്തില്‍ ഒരു പ്രധാന വേഷത്തിലുണ്ടാകുമെന്ന് റിപ്പോര്‍ട്ടുകളുണ്ടായെങ്കിലും ഔദ്യോഗിക സ്ഥിരീകരണം ഉണ്ടായിട്ടില്ല. ‘ദളപതി 67’ല്‍ എന്തായാലും വൻ താരനിര തന്നെ അണിനിരക്കുമെന്ന് തീര്‍ച്ച.
