പ്രദർശനാനുമതി നിഷേധിച്ചതിനെ തുടർന്ന് വാർത്തകളിൽ ഇടം പിടിച്ച ചിത്രമാണ് പാർവതിയെ നായികയാക്കി സിദ്ധാർഥ ശിവ സംവിധാനം നിർവഹിക്കുന്ന വർത്തമാനം. മുംബൈ സെൻസർ റിവിഷൻ കമ്മിറ്റിയാണ് ചെറിയ മാറ്റത്തോടെ ചിത്രത്തിന് പ്രദർശന അനുമതി നൽകിയത്. ജെഎൻയു സമരം പ്രമേയം ആയ സിനിമക്ക് കേരള സെൻസർ ബോർഡ് അനുമതി നിഷേധിച്ചത് വിവാദം ആയിരുന്നു. ബെന്‍സി പ്രൊ‍ഡക്ഷന്‍സ് നിര്‍മ്മിക്കുന്ന ചിത്രത്തിലെ ‘സിന്ദഗി’ എന്ന ഗാനം പുറത്തിറങ്ങി. വിശാൽ ജോൺസന്റെ വരികൾക്ക് ഈണമിട്ട് ആലപിച്ചിരിക്കുന്നത് ഹിഷാം അബ്ദുൾ വഹാബാണ്.
ആര്യാടന്‍ ഷൗക്കത്താണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. കേരളത്തില്‍ നിന്ന് ദില്ലിയിലേക്ക് ഉപരിപഠനത്തിന് എത്തുന്ന കഥാപാത്രത്തെയാണ് പാര്‍വതി ചിത്രത്തിൽ അവതരിപ്പിക്കുന്നത്. റോഷന്‍ മാത്യു, സിദ്ദിഖ്, നിര്‍മ്മല്‍ പാലാഴി എന്നിവരും കഥാപാത്രങ്ങളാണ്. ബെന്‍സി പ്രൊഡക്ഷന്‍സിന്‍റെ ബാനറില്‍ ബേനസീറും ആര്യാടന്‍ ഷൗക്കത്തും ചേര്‍ന്നാണ് നിര്‍മ്മാണം. നിവിന്‍ പോളി നായകനായ ‘സഖാവി’ന് ശേഷം സിദ്ധാര്‍ഥ് ശിവ സംവിധാനം ചെയ്യുന്ന സിനിമയാണ് ‘വര്‍ത്തമാനം’.
