മലയാള സിനിമയിലെ യുവതാരനിരയിൽ ശ്രദ്ധേയനും ആസിഫ് അലിയുടെ സഹോദരനുമായ അസ്കർ അലി നായകനാകുന്ന ‘ജിം ബൂം ബാ’ അണിയറയിൽ ഒരുങ്ങുന്നു. നവാഗതനായ രാഹുൽ രാമചന്ദ്രനാണ് ഈ കോമഡി ത്രില്ലറിന്റെ സംവിധാനം നിർവഹിക്കുന്നത്. ബേസിൽ കഞ്ഞിക്കുഴി എന്ന കഥാപാത്രത്തെയാണ് അസ്കർ അലി ചിത്രത്തിൽ അവതരിപ്പിക്കുന്നത്.
തിരുവനന്തപുരം കേന്ദ്രീകൃതമായ മിസ്റ്റിക് ഫ്രെയിംസ് പ്രൊഡക്ഷൻസിന്റെ ബാനറിൽ സച്ചിൻ വി ജിയാണ് ചിത്രത്തിന്റെ നിർമാണം. വിവേക് രാജ്, ലിമു ശങ്കർ, രാഹുൽ രാമചന്ദ്രൻ എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. അസ്കർ അലിക്ക് പുറമേ ബൈജു സന്തോഷ്, അഞ്ചു കുര്യൻ, നേഹ സക്സേന, അനീഷ് ഗോപാൽ, ലിമു ശങ്കർ, കണ്ണൻ നായർ, രാഹുൽ നായർ ആർ എന്നിവരും ചിത്രത്തിൽ അണിനിരക്കുന്നു.
പി എസ് ജയഹരി ഒറിജിനൽ സ്കോർ ഒരുക്കുമ്പോൾ ജുബൈർ മുഹമ്മദാണ് ഗാനങ്ങൾക്ക് ഈണമിടുന്നത്. പ്രശസ്ത മല്ലു റാപ്പർ ഫെജോയും ചിത്രത്തിന് വേണ്ടി ഒരു ഗാനം ഒരുക്കുന്നുണ്ട്. അനൂപ് വി ഷൈലജയാണ് ക്യാമറാ കൈകാര്യം ചെയ്യുന്നത്. അടുത്ത വർഷം ഫെബ്രുവരി 15ന് ചിത്രം തീയറ്ററുകളിൽ എത്തും