അവിസ്മരണീയ മുഹൂർത്തങ്ങളുടെ കൂടി വേദിയായിരുന്നു മലയാളത്തിലെ താരസൂര്യൻമാർ ഒരുമിച്ച ‘മഴവില്ലഴകിൽ അമ്മ മെഗാ ഷോ’. പാട്ടും നൃത്തവും നർമ്മ രസങ്ങളും നിറഞ്ഞ ആഘോഷരാവ് മലയാളക്കര ഒരിക്കലും മറക്കാനിടയില്ല.
കുടുംബ പ്രേക്ഷകരുടെ പ്രിയപ്പെട്ട നായകൻ ജയറാമും മകൻ കാളിദാസും ഇതാദ്യമായി ഒരു വേദിയിൽ അണിനിരന്നത് പ്രേക്ഷകർക്ക് ഇരട്ടി മധുരമായി. അച്ഛനെ വെല്ലുന്ന മിമിക്രിയുമായിട്ടായിരുന്നു കാളിദാസന്റെ വരവ്. ഇരുവരുടെയും പ്രകടനങ്ങളെ കാഴ്ച്ചക്കാർ കൈയ്യടികളോടെ സ്വീകരിക്കുകയും ചെയ്തു.
കോട്ടയം നസീർ ,കലാഭവൻ പ്രജോത്,സുരാജ്,ടിനി ടോം, സിനിൽ തുടങ്ങി മിമിക്രി രംഗത്തെ പ്രതിഭാധനൻമാരും ഇരുവർക്കുമൊപ്പം വേദി പങ്കിട്ടു.
എന്തായാലും അച്ഛന്റെയും മകന്റെയും മിമിക്രി പ്രകടനം കാണാനായി കാത്തിരിക്കുകയാണ് പ്രേക്ഷകർ. ‘മഴവില്ലഴകിൽ അമ്മ മെഗാഷോ’ മഴവിൽ മനോരമയിൽ ഉടൻ സംപ്രേക്ഷണം ചെയ്യും.
