‘സുഡാനി ഫ്രം നൈജീരിയ’ സിനിമയില്‍ അഭിനയിച്ചതിന് അര്‍ഹിച്ച പ്രതിഫലം ലഭിച്ചില്ലെന്ന് ആരോപിച്ച നൈജീരിയന്‍ താരം സാമുവല്‍ റോബിന്‍സണ്‍ രംഗത്തെത്തിയതായിരുന്നു കഴിഞ്ഞ ദിവസങ്ങളിലെ വലിയ വിവാദം. ഒടുവില്‍ ധനമന്ത്രി തോമസ് ഐസകിന്റെ ഇടപെടലിന്റെ ഭാഗമായി നിര്‍മ്മാതാക്കള്‍ പണം നല്‍കി പ്രശ്‌നം ഒത്തു തീര്‍പ്പാക്കുകയായിരുന്നു.
എന്നാല്‍ വീണ്ടും ഒരു ഫെയ്‌സ്ബുക്ക് പോസ്റ്റുമായി സുഡുമോന്‍ രംഗത്തെത്തിയിരിക്കുകയാണ്. കേരളത്തെ വല്ലാതെ മിസ് ചെയ്യുന്നതായും മറ്റൊരു പ്രൊജക്ടിനായി ഇന്ത്യയിലേക്ക് തിരിച്ചുവരാന്‍ കാത്തിരിക്കുകയാണെന്നും അദ്ദേഹം പറഞ്ഞു. ഇതിനൊപ്പം തനിക്ക് പൊറോട്ടയും ബീഫ് കറിയും കഴിക്കണമെന്നും സാമുവല്‍ ആഗ്രഹം പ്രകടിപ്പിച്ചിരുന്നു. എന്നാല്‍ ഈ പോസ്റ്റ് പിന്നീട് സാമുവല്‍ തിരുത്തി.
ബീഫ് കറി വേണമെന്നത് കോഴിക്കറി വേണമെന്നാക്കിയാണ് തിരുത്തിയത്. മിനിറ്റുകള്‍ക്ക് ശേഷം ഇതും സാമുവല്‍ തിരുത്തി. പൊറോട്ടയും മട്ടണ്‍ക്കറിയും തന്റെ വേണമെന്ന് സാമുവല്‍ പോസ്റ്റില്‍ പറയുന്നു. എന്നാല്‍ ഇതേ പോസ്റ്റിന് കീഴിലെ ഒരു കമന്റിന് മറുപടിയായി സുഡുമോന്‍ പറഞ്ഞത്, തനിക്ക് ബീഫ് കറി തന്നെ മതിയെന്നാണ്. ചിലര്‍ ഭയപ്പെടുത്തിയതിനാലാണ് ബീഫ് എന്നത് മട്ടണ്‍ എന്നാക്കിയതെന്നും സാമുവല്‍ പറയുന്നു.
