‘കസബ’ വിഷയത്തില്‍ മമ്മൂട്ടിയ്ക്ക് പ്രശ്‌നമൊന്നുമില്ലെന്നും അദ്ദേഹത്തിന്റെ ആരാധകരാണ് പ്രശ്നം എല്ലാം ഉണ്ടാക്കുന്നതെന്നും തുറന്നു പറയുകയാണ് തിരക്കഥാകൃത്ത് ബോബി. കസബയിലെ സ്ത്രീവിരുദ്ധതയെ തുറന്നടിച്ച്‌ സംസാരിച്ചതിനെ തുടർന്നാണ് പാര്‍വതിക്കെതിരെ സൈബര്‍ ആക്രമണം ഉണ്ടാകുന്നത്. ഇതിന് ശേഷം പുറത്തിറങ്ങിയ പാർവതിയുടെ മൈ സ്റ്റോറി എന്ന ചിത്രത്തിനെതിരെ ഡിസ്‌ലൈക്ക് ക്യാമ്പയിൻ വരെ നടന്നിരുന്നു.പക്ഷേ കസബ വിഷയത്തിൽ പ്രശ്നം മമ്മൂട്ടിക്ക് അല്ലെന്നും അദ്ദേഹത്തിന്റെ ഫാൻസിനാണെന്നുമാണ് ബോബിയുടെ അഭിപ്രായം. മാതൃഭൂമിയുമായുളള ഒരു അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
കസബ വിഷയവുമായി ബന്ധപ്പെട്ട മമ്മൂട്ടിക്ക് വിരോധം ഉണ്ടായിരുന്നെങ്കിൽ ഞങ്ങളുടെ സിനിമയുടെ ഓഡിയോ ലോഞ്ചിൽ ചീഫ് ഗസ്റ്റായി അദ്ദേഹം എത്തില്ലായിരുന്നു എന്നും ബോബി കൂട്ടിച്ചേർത്തു. മമ്മൂട്ടി ഉയരെ കാണും എന്ന് അറിയിച്ചിട്ടുണ്ടെന്നും അഭിമുഖത്തിൽ ബോബി പറഞ്ഞു. ഉയരെയിൽ ആസിഡ് ആക്രമണത്തെ അതിജീവിച്ച പല്ലവി രവീന്ദ്രൻ എന്ന കഥാപാത്രത്തെയാണ് പാർവതി അവതരിപ്പിക്കുന്നത്. ചിത്രം പ്രേക്ഷകർ ഇതിനോടകം നെഞ്ചിലേറ്റി കഴിഞ്ഞു. നവാഗതനായ മനു അശോകനാണ് ചിത്രം സംവിധാനം ചെയ്തിരിക്കുന്നത്.ആസിഫ് അലി, ടൊവീനോ തോമസ്, സിദ്ദിഖ്, അനാര്‍ക്കലി മരയ്ക്കാര്‍, പ്രതാപ് പോത്തന്‍ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങൾ.
