ചലച്ചിത്രതാരം ധ്യാൻ ശ്രീനിവാസൻ തിരക്കഥയും സംവിധാനവും നിർവഹിക്കുന്ന ചിത്രമാണ് ‘ലവ് ആക്ഷൻ ഡ്രാമ’. മലയാളത്തിലെ യുവതാരം നിവിൻ പോളിയും തെന്നിന്ത്യൻ താരറാണി നയൻതാരയും ആണ് ചിത്രത്തിലെ നായിക നായകന്മാർ. ചിത്രത്തിൽ നിവിൻ പോളി ദിനേശൻ എന്ന കഥാപാത്രത്തെയും നയൻതാര ശോഭ എന്ന കഥാപാത്രത്തെയുമാണ് അവതരിപ്പിക്കുന്നത്. ശ്രീനിവാസൻ, അജു വർഗീസ്, മല്ലികാ സുകുമാരൻ, ജൂഡ് ആന്റണി എന്നിവരാണ് മറ്റു പ്രധാന കഥാപാത്രങ്ങൾ. വർഷങ്ങൾക്കു മുൻപേ ധ്യാൻ തിരക്കഥ പൂർത്തിയാക്കിയ, അജു വർഗീസ് നിർമ്മിക്കുന്ന ഈ ചിത്രം അജുവർഗീസിന്റെ പ്രേരണ കൊണ്ടാണ് ഒടുവിൽ സിനിമയായത്.കഴിഞ്ഞ വർഷം അവസാനം റിലീസ് ചെയ്യേണ്ടിയിരുന്ന ചിത്രമാണ് ഇതെങ്കിലും നിവിന്റെ തിരക്കുകൾ മൂലം ചിത്രത്തിന്റെ ഷൂട്ടിംഗ് നീട്ടി വെക്കേണ്ടി വന്നു.
അടുത്തിടെ നടന്ന ഒരു അഭിമുഖത്തിൽ നിവിൻ ചിത്രത്തിലെ സെറ്റിൽ വച്ച് ഉണ്ടായ ഒരു സംഭവം പറയുകയുണ്ടായി. ചിരി തുടങ്ങിയാൽ നിർത്താൻ പറ്റാത്ത ഒരു ആളാണ് താനെന്നും തന്റെ ഇരട്ടി ചിരിക്കുന്ന ഒരു വ്യക്തിയാണ് നയൻതാര എന്നും നിവിൻ പോളി പറഞ്ഞു. ഇരുവരുടെയും ചിരി മൂലം ഷൂട്ടിംഗ് രണ്ടുമണിക്കൂറോളം നിർത്തി വയ്ക്കേണ്ടി വന്നിട്ടുണ്ട്. ചില സമയത്ത് ധ്യാൻ ശ്രീനിവാസൻ താടിക്ക് കയ്യും കൊടുത്ത് ഇരിക്കേണ്ടി വരുമെന്നും നിവിൻ കൂട്ടിച്ചേർത്തു .ആദ്യ ഷെഡ്യൂൾ അവസാനിപ്പിച്ച അടുത്ത ഷെഡ്യുളിന് തിരികെ വരുമ്പോൾ ചിരി കുറച്ചിട്ട് വരണമെന്ന് ധ്യാൻ പറഞ്ഞു എന്നും നിവിൻപോളി പങ്കുവെക്കുന്നു.
