ശ്രീലങ്കൻ സ്പിൻ ഇതിഹാസം മുത്തയ്യ മുരളീധരന്റെ ജീവിതം സിനിമയാക്കുന്നു.
800 എന്ന് പേരിട്ടിരിക്കുന്ന സിനിമയിൽ മുത്തയ്യ മുരളീധരനാകുന്നത് മക്കൾ സെൽവൻ വിജയ് സേതുപതിയാണ്. മുത്തയയെ അതേപടി പകർത്തിയിരിക്കുകയാണ് വിജയ് സേതുപതി. ചിത്രത്തിന്റെ മോഷൻ പോസ്റ്റർ ഇന്ന് റിലീസ് ചെയ്തു. പോസ്റ്ററിലെ വിജയ് സേതുപതിയുടെ ലുക്ക് കണ്ട് ആരാധകർ ഞെട്ടിയിരിക്കുകയാണ്. വെള്ള ജഴ്സിയില്‍ മുരളിയുടെ സ്വതസിദ്ധമായ ചിരിയോടെ അടിമുടി മുത്തയ്യയായി മാറിയിരിക്കുകയാണ് സേതുപതി. സ്റ്റാര്‍ സ്പോര്‍ട്സ് 1, സ്റ്റാര്‍ സ്പോര്‍ട്സ് 1 തമിഴ് എന്നിവയിലൂടെയാണ് വിജയ് സേതുപതിയും മുത്തയ്യ മുരളീധരനും ചേര്‍ന്ന് മോഷന്‍ പോസ്റ്റര്‍ പുറത്തിറക്കിയത്.
ടെസ്റ്റ് ക്രിക്കറ്റിൽ മുത്തയ്യ നേടിയ 800 വിക്കറ്റ് എന്ന ചരിത്ര നേട്ടമാണ് സിനിമയുടെ പേരിന് കാരണമായത്. ചിത്രം സംവിധാനം ചെയ്യുന്നത് ശ്രീപതി രംഗസ്വാമിയാണ്. ലോകമെമ്പാടും വ്യക്തിമുദ്ര പതിപ്പിച്ച തമിഴ് വംശജനായ കായിക താരമായ മുത്തയ്യ മുരളീധരന്റെ ജീവിതം അവതരിപ്പിക്കാൻ കഴിഞ്ഞതിൽ താൻ ഏറെ സന്തോഷവാനാണ് എന്ന് വിജയ് സേതുപതി പറഞ്ഞു.
മുരളി നേരിട്ട് തന്നെ ചിത്രവുമായി സഹകരിക്കുമെന്നതും ക്രിക്കറ്റുമായി ബന്ധപ്പെട്ട് വിജയ്ക്ക് നിർദ്ദേശങ്ങൾ നല്കുമെന്നും ഉള്ളതിൽ വിജയ് ഏറെ സന്തുഷ്ടനാണ്. ഡാർ പിക്ചേഴ്സ് നിർമിക്കുന്ന ചിത്രം അടുത്ത വർഷം പകുതിയോടെ ചിത്രം റിലീസ് ചെയ്യാൻ ആണ് അണിയറ പ്രവർത്തകർ പദ്ധതിയിടുന്നത്.
