താരങ്ങൾ സംവിധായകരാകുന്ന വാർത്ത ഇപ്പോൾ പ്രേക്ഷകർക്ക് സുപരിചിതമാണ്. പൃഥ്വിരാജ് ആദ്യമായി സംവിധാനം ചെയ്ത ചിത്രമാണ് മോഹൻലാൽ നായകനായെത്തിയ ലൂസിഫർ. ഇത് മലയാളം ഇൻഡസ്ട്രിയിലെ ഒരു വൻ ഹിറ്റായി മാറി. ഇതിനു പിന്നാലെയാണ് മോഹൻലാലും താൻ ഒരു സംവിധായകൻ ആകാൻ പോകുന്നു എന്ന വാർത്ത പ്രേക്ഷകരെ അറിയിച്ചത്. ബറോസ് എന്ന ത്രീ ഡി ചിത്രമാണ് മോഹൻലാലിന്റെ പ്രോജക്ട്. പൃഥ്വിരാജിനെ നായകനാക്കി നടൻ കലാഭവൻ ഷാജോൺ സംവിധാനം ചെയ്യുന്ന ചിത്രമാണ് ബ്രദേഴ്സ് ഡേ. ചിത്രത്തിന്റെ ഷൂട്ടിംഗ് ഇപ്പോൾ പുരോഗമിച്ചുകൊണ്ടിരിക്കുകയാണ്. ഇവരുടെ കൂട്ടത്തിലേക്ക് ഒരു പേരുകൂടി ചേർക്കപ്പെടുകയാണ്, ജയറാം. കേരളകൗമുദിയുമായുള്ള അഭിമുഖത്തിലാണ് ജയറാം തന്റെ തീവ്രമായ ആഗ്രഹം വെളിപ്പെടുത്തിയത്.
സംവിധായകൻ ആവുക എന്നത് അത്ര എളുപ്പമുള്ള കാര്യമല്ല എന്നും ഒരു സിനിമ സംവിധാനം ചെയ്യുക എന്നത് തന്നെ സംബന്ധിച്ചിടത്തോളം വലിയ ഒരു സ്വപ്നമാണെന്നും അദ്ദേഹം പറയുന്നു.താൻ സംവിധാനം ചെയ്യാൻ ആഗ്രഹിക്കുന്ന സിനിമ ഒരു പക്കാ കൊമേഴ്സ്യൽ ചിത്രം അല്ല മലയാളികളുടെ മനസ്സിൽ എന്നും ഒരു ഓർമയായി നിൽക്കുന്ന ഒരു ചിത്രമായിരിക്കും എന്ന് അദ്ദേഹം കൂട്ടിച്ചേർത്തു.ഇപ്പോൾ ചിത്രങ്ങളിൽ അഭിനയിക്കുന്നതിന്റെ തിരക്കിലാണെന്നും അതിനുശേഷം ഉറപ്പായും അത് ചെയ്യും എന്നാണ് അദ്ദേഹം പറയുന്നത്. ലോനപ്പന്റെ മാമോദിസയാണ് ജയറാമിന്റേതായി ഏറ്റവും ഒടുവിൽ റിലീസായ ചിത്രം. റിലീസിനൊരുങ്ങുന്ന ഏറ്റവും പുതിയ ചിത്രം മൈ ഗ്രേറ്റ് ഫാദർ ആണ്.
