ലാലേട്ടന്റെ സിനിമ ബിഗ് സ്‌ക്രീനിൽ ആദ്യ ഷോ കണ്ടപ്പോൾ തുടങ്ങിയതാണ് ലാലേട്ടനോടും സിനിമയോടുമുള്ള സ്നേഹം;ലാലേട്ടന് പിറന്നാൾ ആശംസകൾ നേർന്ന് വിശാഖ് സുബ്രഹ്മണ്യം

മലയാള സിനിമയുടെ എക്കാലത്തെയും വലിയ നടന തിലകത്തിന് ഇന്ന് പിറന്നാൾ മംഗളങ്ങൾ.വിശ്വനാഥൻ നായരുടേയും ശാന്താകുമാരിയുടേയും പുത്രനായി പത്തനംതിട്ടയിലെ ഇലന്തൂരുള്ള വീട്ടിൽ ജനിച്ച ഈ താരരാജാവ് അറുപതാം ജന്മദിനം ആഘോഷിക്കുകയാണ് മേയ് 21ന്. തങ്ങളുടെ പ്രിയപ്പെട്ട ലാലേട്ടൻറെ പിറന്നാൾ എക്കാലവും ഓർത്തുവെക്കാൻ പാകത്തിന് അവിസ്മരണീയമാക്കാൻ ഉള്ള തയ്യാറെടുപ്പിലാണ് ലോകമെമ്പാടുമുള്ള ലാലേട്ടൻ ആരാധകർ.

ഇപ്പോൾ മോഹൻലാലിന് ജന്മദിന ആശംസകൾ നൽകി രംഗത്ത് എത്തിയിരിക്കുകയാണ് തിയറ്റർ ഉടമസ്ഥനും നിർമാതാവുമായ വിശാഖ് സുബ്രഹ്മണ്യം

വിശാഖിന്റെ ഇൻസ്റ്റാഗ്രാം പോസ്റ്റിന്റെ ചുരുക്കം :

പിറന്നാൾ ആശംസകൾ ലാലേട്ടാ….
ചെറുപ്പത്തിൽ ലാലേട്ടൻ സിനിമകൾ ആദ്യ ഷോ തന്നെ തീയേറ്ററിൽ കാണുന്ന ആ ദിവസം തുടങ്ങിയതാണ് എനിക്ക് സിനിമയോടുള്ള ഇഷ്ടം. ശ്രീകുമാർ തിയേറ്ററിൽ ഒരു മോഹൻലാൽ സിനിമ ഇറങ്ങുന്നത് എനിക്ക് ഇപ്പോഴും ഓർമ്മയുണ്ട്. ഒരു ഉത്സവ പ്രതീതിയാണ് ആ ദിവസം. ചെണ്ടമേളവും പാലഭിഷേകവും ടിക്കറ്റിന് വേണ്ടിയുള്ള നീണ്ട ക്യൂവുമായി ആ ദിവസം ആരാധകർ ആഘോഷമാക്കുന്നു. “ലൈറ്റ് ഓഫ് ആക്കടാ”,”സിനിമ ഇടടാ” തുടങ്ങിയുള്ള ആരാധകരുടെ ആവേശം പ്രകടനങ്ങൾക്ക് ശേഷം ബിഗ് സ്ക്രീനിൽ അവരുടെ താരരാജാവ് എത്തുമ്പോൾ അവർ ലാലേട്ടാ ലാലേട്ടാ എന്ന് ആർപ്പു വിളിച്ച് സ്ക്രീനിൽ മുമ്പിൽ ആഘോഷങ്ങൾ നടത്തുന്നു . ഇപ്പോഴത്തെ ഈ പ്രതിസന്ധി കഴിയുമ്പോൾ മരയ്ക്കാർ കാണുവാൻ ഞാനും കാത്തിരിക്കുകയാണ്. ലാലേട്ടന് നിങ്ങൾ കൊടുക്കുന്ന ഈ സ്നേഹം പ്രണവ് മോഹൻലാലിന് ഹൃദയത്തിലൂടെ കൊടുക്കും എന്നും എനിക്ക് ഉറപ്പാണ്. ഹൃദയത്തിൻറെ ഷൂട്ടിംഗ് എവിടെ വരെയായി എന്ന് ചോദിക്കുന്നവർക്കായി… ചിത്രത്തിൻറെ പകുതിയോളം ഷൂട്ടിംഗ് കഴിഞ്ഞു… ഷൂട്ടിങ് പൂർത്തിയായ ശേഷം ചിത്രത്തിൻറെ റിലീസ് പ്രഖ്യാപിക്കും. ലോകമെമ്പാടും ഒരേ സമയം തിയേറ്ററിലെത്തിക്കാൻ പാകത്തിനാണ് ചിത്രം ഇറങ്ങുക

തിരനോട്ടം എന്ന ചിത്രത്തിലൂടെ മലയാള സിനിമയിലേക്ക് കാൽ വച്ച മോഹൻലാൽ വിശ്വനാഥന് പിന്നീടൊരിക്കൽ തിരിഞ്ഞുനോക്കേണ്ടിവന്നിട്ടില്ല
ഏറ്റവും ഒടുവിൽ മരയ്ക്കാറായി രംഗപ്രവേശം ചെയ്യുവാൻ പ്രിയതാരം ഒരുങ്ങുമ്പോൾ ആരാധകരും ആവേശത്തിലാണ് .രണ്ടു തവണ മികച്ച നടനുള്ളതടക്കം നാല് ദേശീയ ചലച്ചിത്ര പുരസ്കാരങ്ങളടക്കം ഈ പ്രതിഭയെ തേടിയെത്തിയിട്ടുണ്ട്. തുടര്‍ന്ന് ഇന്ത്യൻ ചലച്ചിത്രങ്ങൾക്ക് നൽകിയ സംഭാവനകൾ പരിഗണിച്ച് 2001 ൽ അദ്ദേഹത്തിന് പത്മശ്രീയും ഈ വർഷം അദ്ദേഹത്തിന് പദ്മഭൂഷനും നൽകി രാജ്യം ആദരിച്ചു. ഈ ലോക്ക് ഡൗണിന് ശേഷം വീണ്ടും ദൃശ്യത്തിലെ ജോർജ്കുട്ടി ആകുവാനുള്ള ഒരുക്കത്തിലാണ് ലാലേട്ടൻ. ലാലേട്ടന്റെ വരുംകാല സിനിമകൾക്കും അദ്ദേഹത്തിൻറെ ജീവിതത്തിന് എല്ലാവിധ ആശംസകളും നേരുന്നതിനോടൊപ്പം അദ്ദേഹത്തിന് നല്ലൊരു ജന്മദിനവും ആശംസിക്കുന്നു.