നടൻ ജോജു ജോർജിന് പിന്തുണയുമായി സംവിധായകൻ ആഷിഖ് അബു. ഇൻസ്റ്റഗ്രാമിൽ ജോജുവിന്ടെ പടം പോസ്റ്റ് ചെയ്താണ് ആഷിഖ് അബു പിന്തുണ അറിയിച്ചത്. ‘യൂത്ത് കോൺഗ്രസ് ആക്രമിക്കുന്ന ജോജുവിനൊപ്പം’ എന്ന അടിക്കുറിപ്പ് നൽകിയത് കൂടാതെ, #InSolidarityWithJojuGeorge എന്ന ഹാഷ്ടാഗും ഒപ്പം ചേർത്തിട്ടുണ്ട്. ഇന്ധന വിലവർദ്ധനയിൽ പ്രതിഷേധിച്ച് എറണാകുളം ജില്ല കോൺഗ്രസ് കഴിഞ്ഞയാഴ്ച റോഡ് ഉപരോധിച്ച് സമരം നടത്തിയിരുന്നു. കോൺഗ്രസിന്റെ റോഡ് ഉപരോധ സമരത്തെ തുടർന്ന് ഗതാഗതതടസം നേരിടുകയും ഗതാഗതക്കുരുക്ക് ഉണ്ടാകുകയും ചെയ്തു. ജോജു ജോർജും ഗതാഗതക്കുരുക്കിൽ ഉൾപ്പെട്ടവരിൽ ഉണ്ടായിരുന്നു. കാറിൽ നിന്ന് ഇറങ്ങിയ ജോജു ജോർജ് പരസ്യമായി സമരത്തിനെതിരെ രംഗത്തെത്തി. ജോജുവിനെ പിന്തുണച്ച് യാത്രക്കാരായ ജനങ്ങളും ഇറങ്ങി. ഇത് കോൺഗ്രസിന്റെ സമരരീതിയെ മോശമായി ബാധിക്കുകയും കോൺഗ്രസ് പ്രവർത്തകർ ജോജുവിന്റെ കാർ തല്ലിത്തകർക്കുകയും ചെയ്തു. ജോജുവിനെതിരെ നിരവധി ആരോപണങ്ങളും കോൺഗ്രസ് ഉന്നയിച്ചെങ്കിലും മിക്ക ആരോപണങ്ങളും നിലനിൽക്കുന്നത് അല്ലായിരുന്നു. എന്നാൽ, അതിനു ശേഷവും ജോജുവിന് എതിരെയുള്ള ആക്രമണങ്ങൾ കോൺഗ്രസ് തുടരുകയാണ്. റോഡ് തടഞ്ഞിട്ടുള്ള സിനിമാ ഷൂട്ടിംഗുകൾ തടയുമെന്നാണ് യൂത്ത് കോൺഗ്രസിന്റെ പ്രഖ്യാപനം. ഈ പശ്ചാത്തലത്തിലാണ് ജോജുവിന് പിന്തുണയുമായി ആഷിഖ് അബു രംഗത്തെത്തിയിരിക്കുന്നത്.
അതേസമയം, ജോജു ജോർജ് വിവാദത്തിൽ പ്രതിപക്ഷനേതാവ് വിഡി സതീശന് ഫെഫ്ക ജനറൽ സെക്രട്ടറിയും സംവിധായകനുമായ ബി ഉണ്ണിക്കൃഷ്ണൻ കത്ത് നൽകി. സഹപ്രവർത്തകന് ബുദ്ധമുട്ട് ഉണ്ടായപ്പോൾ സമാശ്വസിപ്പിക്കുകയാണ് താൻ ചെയ്തതെന്ന് കത്തിൽ വ്യക്തമാക്കിയ ഉണ്ണികൃഷ്ണൻ ജോജുവിന്റെ ഇടപെടലിലെ രാഷ്ട്രീയശരി തർക്കവിഷയമാണെങ്കിലും അദ്ദേഹത്തിന്റെ പ്രതിഷേധത്തെ ജനാധിപത്യപരമായി കാണുന്നതാണ് ഉചിതമെന്ന് കത്തിൽ വ്യക്തമാക്കുന്നു. ജോജു തന്നെയാണ് വിഷയം ഒത്തുതീർപ്പാക്കണോ എന്ന വിഷയത്തിൽ തീരുമാനം എടുക്കേണ്ടത്. മുണ്ടക്കയത്ത് സിനിമാ ലൊക്കേഷനിലേക്ക് കോൺഗ്രസ് പ്രവർത്തകർ മാർച്ച് നടത്തിയ സംഭവത്തിൽ പ്രതിപക്ഷ നേതാവെന്ന നിലയിൽ ഇടപെടണമെന്നും ഉണ്ണിക്കൃഷ്ണൻ കത്തിലൂടെ ആവശ്യപ്പെട്ടിരുന്നു.
ഇതിനിടെ, ജോജുവിന്റെ കാർ തല്ലിത്തകർത്ത കേസിൽ രണ്ടു പ്രതികൾ കീഴടങ്ങിയില്ല. ഇതോടെ കോൺഗ്രസ് പ്രതിസന്ധിയിലായിരിക്കുകയാണ്. യൂത്ത് കോൺഗ്രസ് സംസ്ഥാന സെക്രട്ടറി പി വൈ ഷാജഹാനും മണ്ഡലം പ്രസിഡന്റ് അരുൺ വർഗീസുമാണ് ഇനി കീഴടങ്ങാനുള്ളത്. ആരോഗ്യപ്രശ്നങ്ങൾ ഉള്ളതിനാലാണ് ഷാജഹാൻ കീഴടങ്ങാത്തത് എന്നാണ് വിവരം. നഷ്ടുപരിഹാരത്തുകയുടെ പകുതിയെങ്കിലും കെട്ടിവെച്ചാൽ പ്രതികൾക്ക് ജാമ്യം ലഭിക്കുകയാണെങ്കിൽ കോൺഗ്രസ് അതിനു തയ്യാറാകുമെന്നാണ് അറിയുന്നത്.
