കൊവിഡ് കാലത്ത് ഷൂട്ടിങ്ങുകള്‍ നിര്‍ത്തി വയ്ക്കുകയും ശേഷം നീണ്ട ഇടവേളയെടുത്ത് മലയാള സിനിമ വീണ്ടും സജീവമാകുമ്പോഴാണ് ഡൊമിന്‍ ഡിസില്‍വ സംവിധാനം ചെയ്യുന്ന അബാം മൂവീസിന്റെ ബാനറില്‍ എബ്രഹാം മാത്യു ചിത്രം പുറത്ത് വരുന്നു എന്ന വാര്‍ത്ത അണിയറ പ്രവര്‍ത്തകര്‍ പുറത്ത് വിട്ടത്.
ചിത്രത്തിന്റെ ചിത്രീകരണവും ഭാഗികമായി പുനരാരംഭിച്ച വാര്‍ത്തയും സോഷ്യല്‍മീഡിയയിലൂടെ പുറത്ത് വന്നിരുന്നു. ജോജു ജോര്‍ജും ഷീലു എബ്രഹാമുമാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ ടൈറ്റില്‍ ലോഞ്ച് പൃഥ്വിരാജിന്റെ സോഷ്യല്‍മീഡിയ പേജിലൂടെ പുറത്ത് വിടുമെന്ന് അണിയറ പ്രവര്‍ത്തകര്‍ ഇപ്പോള്‍ അറിയിച്ചിരിക്കുകയാണ്.
കൊവിഡ് പ്രോട്ടോക്കോള്‍ പാലിച്ച് കര്‍ശന നിയന്ത്രണങ്ങളോടെയാണ് സിനിമ ചിത്രീകരിച്ചത്. സുവിന്‍ സോമശേഖരന്‍ ആണ് ചിത്രത്തിന്റെ തിരക്കഥ ഒരുക്കുന്നത്. ക്യാമറ തരുണ്‍ ഭാസ്‌ക്കറാണ്. നീരജ് മാധവ് നായകനായി എത്തിയ ‘പൈപ്പില്‍ ചുവട്ടിലെ പ്രണയം’ എന്ന ചിത്രത്തിലൂടെ ശ്രദ്ധേയനായ സംവിധായകന്‍ ഡൊമിന്‍ ഡിസില്‍വയാണ് ചിത്രത്തിന്റെ സംവിധായകന്‍.
