കരിക്കിന്റെ പുതിയ വെബ് സീരീസായ ‘കലക്കാച്ചി’ ആണ് ഇപ്പോൾ യുട്യൂബിൽ ട്രെൻഡിങ്ങ്. യുട്യൂബിൽ ട്രെൻഡിങ്ങ് നമ്പർ 1 ആണ് ‘കലക്കാച്ചി’ ഫൈനൽ പാർട്ട്. കരിക്കിലെ ഓരോരുത്തരും വളരെ വ്യത്യസ്തമായ വേഷങ്ങളിൽ എത്തിയ ‘കലക്കാച്ചി’യിൽ ഏറ്റവും കൈയടി നേടിയത് അനു കെ അനിയൻ ചെയ്ത പൊലീസുകാരന്റെ വേഷമായിരുന്നു. ഒപ്പം കലക്കാച്ചിയുടെ രണ്ടാമത്തെ എപ്പിസോഡിൽ കൈയടി നേടിയ കഥാപാത്രമായിരുന്നു നടൻ ആദിനാട് ശശിയുടേത്.
കലക്കാച്ചിയിൽ അർജുൻ രത്തൻ അവതരിപ്പിച്ച കഥാപാത്രമായ സ്ലൈഡ് എന്ന് വിളിപ്പേരുള്ള കള്ളൻ കഥാപാത്രത്തെ പുതിയ സ്ഥലത്ത് മോഷണത്തിന് എത്തിക്കുന്ന മറ്റൊരു കള്ളനായിട്ടാണ് ആദിനാടി ശശി എത്തുന്നത്. തല മൊട്ടയടിച്ച ഒരു സീനിയർ കള്ളൻ. ഏതോ ലക്ഷ്വറി ഹോട്ടലിൽ ആഘോഷിക്കുമ്പോൾ ആണ് സ്ലൈിഡ് സഹായത്തിന് വിളിക്കുന്നത്. കലക്കാച്ചി കണ്ടവരുടെ മനസിൽ മായാതെ നിൽക്കുന്ന വേഷമാണ് ആദിനാട് ശശിയുടേത്.
നാടകരംഗത്ത് നിന്ന് തുടങ്ങി ഇപ്പോൾ വെബ് സീരിസിൽ വരെ എത്തി നിൽക്കുന്ന ആദിനാട് ശശി അതിശയിപ്പിക്കുന്ന ഒരു നടൻ തന്നെയാണ്. ജാഗ്രത, കോട്ടയം കുഞ്ഞച്ഛൻ, നന്മ നിറഞ്ഞവൻ ശ്രീനിവാസൻ, തുടങ്ങി നിരവധി സിനിമകളിൽ നടൻ അഭിനയിച്ചിട്ടുണ്ട്. ഹെലൻ എന്ന സിനിമയിലും മികച്ച കഥാപാത്രമായി ആദിനാട് ശശി തിളങ്ങി. ബിജു മേനോൻ നായകനായി എത്തിയ ലീല എന്ന സിനിമയിൽ ജബ്ബാർ എന്ന കഥാപാത്രമായും എത്തി. ചട്ടമ്പിനാട്, ഇയ്യോബിന്റെ പുസ്തകം, ഹോട്ടൽ കാലിഫോർണിയ, രാമലീല തുടങ്ങിയ സിനിമകളിലും നടൻ അഭിനയിച്ചിട്ടുണ്ട്. പത്തൊമ്പതാം നൂറ്റാണ്ടാണ് ഇനി പുറത്തിറങ്ങാനുള്ള സിനിമ.
