ആരാധകന്റെ വിവാഹത്തിന് ഭാര്യാസമേതം എത്തി ആശംസകൾ നേർന്ന് നടൻ ആസിഫ് അലി. ആലപ്പുഴ സ്വദേശിയായ സാൻ കുര്യന്റെ വിവാഹത്തിനാണ് ആസിഫ് അലിയും ഭാര്യ സമയും എത്തിയത്. തനിക്ക് സാനുമായി പന്ത്രണ്ട് വർഷത്തെ പരിചയം ഉണ്ടെന്നും ഇവരുടെയൊക്കെ പിന്തുണയും സ്നേഹവും കൊണ്ടാണ് അദ്ധ്വാനവും കൊണ്ടാണ് താൻ ഇവിടെ വരെ എത്തി നിൽക്കുന്നതെന്നും വിവാഹവേദിയിൽ സംസാരിക്കുന്നതിനിടെ ആസിഫ് അലി പറഞ്ഞു.
വിവാഹച്ചടങ്ങിന്റെ തുടക്കം മുതൽ താരം സജീവ സാന്നിധ്യമായി ഉണ്ടായിരുന്നു. വിവാഹത്തിനെത്തിയ ഓരോ ആളുകളോടും സംസാരിച്ചും വിശേഷങ്ങൾ ചോദിച്ചുമാണ് താരം യാത്രയായത്. അതേസമയം, ആരാധകന്റെ വിവാഹത്തിൽ പങ്കെടുക്കാൻ സമയം കണ്ടെത്തി എത്തിയ ആസിഫ് അലിയെ സോഷ്യൽ മീഡിയയിൽ നിരവധി പേരാണ് അഭിനന്ദിച്ചിരിക്കുന്നത്.
‘അയാൾ അങ്ങെനെയാണ് സ്വന്തം കല്യാണത്തിന് ഫാൻസിനെ ക്ഷണിക്കും. ആരാധകന്റെ കല്യാണത്തിന് തിരക്കുകൾ എല്ലാം മാറ്റി വെച്ച് പങ്കെടുക്കും. ഫാൻസുമായി ഇത്രയും അടുപ്പം ഉള്ള മറ്റൊരു യൂത്തൻ ഇല്ല എന്ന് തന്നെ പറയാം.’ – ചിത്രങ്ങൾ പങ്കുവെച്ചുകൊണ്ട് അഫ്സൽ എന്നയാൾ കുറിച്ചു. ‘വിജയ പരാജയങ്ങൾ ഒരു നടന് ഉണ്ടായേക്കാം പക്ഷെ ചങ്ക് പറിച്ചെടുത്തു കാണിക്കുന്ന ആരാധകന് അത്രേം തന്നെ ആഴത്തിൽ ആ സ്നേഹവും തിരിച്ചുകൊടുന്നുണ്ടെങ്കിൽ മറ്റു സന്തോഷങ്ങളുടെ കൂടെ ഭാഗവും ആവുന്നുണ്ടെങ്കിൽ അദ്ദേഹം നല്ലൊരു നടന് ഉപരി നല്ലൊരു വ്യക്തി കൂടെ ആയിരിക്കണം’ – ആരാധകൻ വീഡിയോ പങ്കുവെച്ച് കൊണ്ട് കുറിച്ചു.