ദുല്‍ഖര്‍ സല്‍മാന്‍ നായകനായി എത്തിയ തെലുങ്ക് ചിത്രം സീതാരാമം വമ്പന്‍ ഹിറ്റിലേക്ക്. ഓഗസ്റ്റ് അഞ്ചിന് റിലീസ് ചെയ്ത ചിത്രം ഇതിനോടകം 75 കോടിയിലധികം രൂപ കളക്ട് ചെയ്തതായാണ് റിപ്പോര്‍ട്ട്. ആഗോള ബോക്‌സ് ഓഫിസ് കളക്ഷനാണിത്. ദുല്‍ഖര്‍ സല്‍മാന്‍ ഫേസ്ബുക്കിലൂടെ അറിയിച്ചതാണ് ഇക്കാര്യം.
അതേസമയം, സീതാരാമത്തിന്റെ ഹിന്ദി പതിപ്പ് സെപ്റ്റംബര്‍ രണ്ടിന് റിലീസ് ചെയ്യും. ഡബ്ബ് ചെയ്ത വേര്‍ഷനാണ് വരുന്നത്. ഇതോടെ ചിത്രത്തിന്റെ ആഗോള ബോക്‌സ് ഓഫിസ് കളക്ഷന്‍ നൂറ് കോടി കടക്കുമെന്നുറപ്പായി. ലോകമെമ്പാടും സീതാരാമത്തിന് മികച്ച പ്രതികരണമായിരുന്നു ലഭിച്ചത്. താന്‍ പ്രതീക്ഷതിനേക്കാള്‍ മികച്ച പ്രതികരണമായിരുന്നു ചിത്രത്തിന് ലഭിച്ചതെന്നാണ് ദുല്‍ഖര്‍ സല്‍മാന്‍ പറഞ്ഞത്.
തെലുങ്കിന് പുറമേ തമിഴ്, മലയാളം ഭാഷകളിലാണ് സീതാരാമം പ്രേക്ഷകരിലേക്കെത്തിയത്.
ഹനു രാഘവപുടിയാണ് സീതാരാമം സംവിധാനം ചെയ്തത്. ദുല്‍ഖര്‍ സല്‍മാന്‍ ലെഫ്റ്റനന്റ് റാം എന്ന കഥാപാത്രമായാണ് ചിത്രത്തില്‍ എത്തിയത്. മൃണാള്‍ താക്കൂര്‍, രശ്മിക മന്ദാന, സുമന്ത്, തരുണ്‍ ഭാസ്‌കര്‍, ഗൗതം വാസുദേവ് മേനോന്‍, ഭൂമിക ചൗള എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചത്.
