അഭിനയവും ചെണ്ടമേളവും മാത്രമല്ല കൃഷിയും പശുവളര്‍ത്തലുമുള്‍പ്പെടെ തനിക്ക് വശമുണ്ടെന്ന് തെളിയിച്ചിരിക്കുകയാണ് നടന്‍ ജയറാം. സ്വന്തം നാടായ പെരുമ്പാവൂരില്‍ ആറേക്കര്‍ സ്ഥലത്താണ് ജയറാമിന്റെ ഫാം.
ആനന്ദ് എന്നാണ് ജയറാം ഫാമിന് നല്‍കിയിരിക്കുന്ന പേര്. 100 പശുക്കളാണ് ഫാമിലുള്ളത്. ഇതിന് പുറമെ, വാഴയും ജാതിയും വിവിധയിനം പഴങ്ങളും തീറ്റപ്പുല്ലും ഉള്‍പ്പെടെ ഇവിടെയുണ്ട്. എച്ച് എഫ് ഇനം പശുക്കളാണ് കൂടുതല്‍. വെച്ചൂര്‍, ജഴ്സി പശുക്കളുമുണ്ട്. ഗംഗ, യമുന തുടങ്ങി നദികളുടെ പേരാണ് പശുക്കള്‍ക്ക് നല്‍കിയിരിക്കുന്നത്.
ശാസ്ത്രീയമായ രീതിയിലാണ് മാലിന്യസംസ്‌കരണം. പശുക്കളുടെ ചാണകം ഉപയോഗിച്ചാണ് ഫാമിന് ആവശ്യമായ വൈദ്യുതി ഉല്‍പാദിപ്പിക്കുന്നത്. ഇത്തവണത്തെ കൃഷിവകുപ്പിന്റെ കാര്‍ഷിക പുരസ്‌കാരവും ജയറാം സ്വന്തമാക്കി. കാര്‍ഷിക രംഗത്തെ മികച്ച സംഭാവനകള്‍ പരിഗണിച്ച് ജയറാമിനെ പ്രത്യേകം ആദരിക്കാനും തീരുമാനിച്ചിട്ടുണ്ട്.
