മമ്മൂട്ടി കേന്ദ്രകഥാപാത്രമായി എത്തുന്ന തെലുങ്ക് ചിത്രം ഏജന്റിന്റെ ചിത്രീകരണം പുരോഗമിക്കുകയാണ്. അഖില്‍ അക്കിനേനിയാണ് ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ഇപ്പോഴിതാ ചിത്രത്തിന്റെ ലൊക്കേഷനില്‍ നിന്നുള്ള ദൃശ്യങ്ങള്‍ പങ്കുവച്ചിരിക്കുകയാണ് മമ്മൂട്ടി.
View this post on Instagram
തോക്കുപിടിച്ച് തീയ്ക്കും പുകയ്ക്കുമിടയിലൂടെ നടന്നു നീങ്ങുന്ന മമ്മൂട്ടിയാണ് വിഡിയോയില്‍. ഷൂട്ടിംഗ് നടക്കുന്ന ബുടാപെസ്റ്റില്‍ നിന്നുള്ളതാണ് വിഡിയോ. ‘ ഏജന്റ് ബുടാപെസ്റ്റ് എന്നാണ് വിഡിയോക്ക് നല്‍കിയിരിക്കുന്ന ക്യാപ്ഷന്‍. നിരവധി പേരാണ് വിഡിയോക്ക് കമന്റുമായി എത്തിയത്. ഈ പ്രായത്തിലും മാസിന് ഒരു കുറവുമില്ലെന്നാണ് ഒരു ആരാധകന്‍ കമന്റ് ചെയ്തിരിക്കുന്നത്. ഏജന്റിനായി കാത്തിരിക്കുകയാണെന്നും പലരും കമന്റ് ചെയ്തു.
സുരേന്ദര്‍ റെഡ്ഢിയാണ് സിനിമ സംവിധാനം ചെയ്യുന്നത്. ഹിപ്ഹോപ്പ് തമിഴയാണ് സംഗീതം നല്‍കുന്നത്. ചിത്രത്തില്‍ പട്ടാള ഉദ്യോഗസ്ഥന്റെ വേഷത്തിലാണ് മമ്മൂട്ടി എത്തുന്നത്. ആക്ഷന്‍ രംഗങ്ങള്‍ക്ക് ഏറെ പ്രാധാന്യമുള്ള ചിത്രമാണ് ‘ഏജന്റ്’. രാകുല്‍ ഹെരിയന്‍ ആണ് ഛായാഗ്രഹണം. ഹോളിവുഡ് ത്രില്ലര്‍ ബോണ്‍ സീരിസില്‍ നിന്നും പ്രചോദനമുള്‍ക്കൊണ്ട് ഒരുക്കുന്ന ചിത്രമാണ് ‘ഏജന്റ്’. രണ്ടായിരത്തി പത്തൊമ്പതില്‍ പുറത്തിറങ്ങിയ ‘യാത്ര’യാണ് മമ്മൂട്ടി അവസാനം അഭിനയിച്ച തെലുങ്ക് ചിത്രം. വൈ എസ് രാജശേഖര റെഡ്ഡിയുടെ രാഷ്ട്രീയജീവിതം ആവിഷ്‌കരിച്ച ചിത്രത്തില്‍ വൈഎസ്ആറായി എത്തിയത് മമ്മൂട്ടി ആയിരുന്നു. 2004 നിയമസഭാ തെരഞ്ഞെടുപ്പില്‍, ചിത്രത്തിലില്ലാതിരുന്ന കോണ്‍ഗ്രസ് പാര്‍ട്ടിയെ അധികാരത്തിലെത്താന്‍ സഹായിച്ച, വൈഎസ്ആര്‍ നടത്തിയ 1475 കി.മീ. നീണ്ട പദയാത്രയെ അടിസ്ഥാനമാക്കിയുള്ളതായിരുന്നു ചിത്രം.
