പ്രഭാസിനെ നായകനാക്കി രാധാകൃഷ്ണകുമാര്‍ സംവിധാനം ചെയ്ത ചിത്രമാണ് രാധേശ്യാം.
മാര്‍ച്ച് 11 ന് തിയേറ്ററുകളിലെത്തിയ ചിത്രത്തിന് ശരാശരി പ്രതികരണമാണ് ലഭിച്ചത്. പ്രഭാസ് ആരാധകര്‍ ഉദ്ദേശിച്ച രീതിയില്‍ ചിത്രം നിലവാരം പുലര്‍ത്തിയില്ല. 350 കോടി മുതല്‍ മുടക്കി എടുത്ത ചിത്രം നേടിയത് 214 കോടി മാത്രം ആണ്. ചിത്രത്തിന്റെ പരാജയം സംബന്ധിച്ച് പ്രതികരിച്ചിരിക്കുകയാണ് പ്രഭാസ്.
കൊവിഡ് അല്ലെങ്കില്‍ തിരക്കഥയിലെ കുറവ്, ഇതാകാം രാധേ ശ്യാമിന്റെ പരാജയത്തിന് കാരണമെന്നാണ് പ്രഭാസ് പറയുന്നത്. തന്നെ അങ്ങനെ കാണുവാന്‍ ആളുകള്‍ ആഗ്രഹിക്കുന്നുണ്ടാവില്ല. തന്നില്‍ നിന്ന് നല്ലത് മാത്രം പ്രതീക്ഷിക്കുന്നത് കൊണ്ടായിരിക്കാം അതെന്നും പ്രഭാസ് പറയുന്നു. ബാഹുബലി വരെയുള്ള കാലം ഒരു ഒഴുക്ക് പോലെ ആയിരുന്നു. എന്നാല്‍ അതിന് ശേഷമുള്ള ഓരോ ദിവസവും ഓരോ പരീക്ഷണങ്ങളാണ്. ശരിക്കുമൊരു പരീക്ഷണ ഘട്ടം എന്ന് പറയാം. ഇനി വരുന്ന വര്‍ഷങ്ങളില്‍ എങ്ങനെയാണ് ഒരു ഇന്ത്യന്‍ സിനിമ വേണ്ടതെന്ന് തനിക്ക് മനസിലായേക്കാമെന്നും പ്രഭാസ് പറഞ്ഞു.
പ്രശാന്ത് നീലിന്റെ സലാറാണ് പ്രഭാസിന്റെ അടുത്ത ചിത്രം. പൃഥ്വിരാജ് സുകുമാരന്‍, ശ്രുതി ഹാസന്‍ തുടങ്ങി ഒരു വലിയ താരനിര തന്നെ ചിത്രത്തില്‍ വേഷമിടുന്നുണ്ട്. ആദിപുരുഷ് ആണ് മറ്റൊരു ചിത്രം. സെയ്ഫ് അലി ഖാന്‍, കൃതി സനോണ്‍ എന്നിവരാണ് ചിത്രത്തിലെ മറ്റു താരങ്ങള്‍. ഈ രണ്ട് പ്രൊജക്ടുകളും പാന്‍ ഇന്ത്യന്‍ റിലീസുകളാണ്.
