മലയാളികളുടെ പ്രിയപ്പെട്ട യുവതാരം പൃഥ്വിരാജ് സുകുമാരൻ നായകനായി എത്തുന്ന ചിത്രമാണ് കടുവ. ഷാജി കൈലാസ് സംവിധാനം ചെയ്ത ചിത്രം ജൂൺ 30ന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യും. ചിത്രം റിലീസ് ചെയ്യുന്നതിനു മുന്നോടിയായി വമ്പൻ പ്രമോഷനാണ് ചിത്രത്തിന്റെ അണിയറപ്രവർത്തകർ ഒരുക്കിയിരിക്കുന്നത്. അതേസമയം, ചിത്രത്തിൽ മോഹൻലാൽ അതിഥിവേഷത്തിൽ എത്തുന്നു എന്ന രീതിയിൽ വാർത്തകൾ പ്രചരിച്ചിരുന്നു. എന്നാൽ, അതിൽ സത്യമില്ലെന്ന് വ്യക്തമാക്കിയിരിക്കുകയാണ് പൃഥ്വിരാജ്. ഒരു മാധ്യമത്തിന് നൽകിയ അഭിമുഖത്തിലാണ് പൃഥ്വിരാജ് ഇക്കാര്യം വ്യക്തമാക്കിയത്. കടുവയിൽ മോഹൻലാലും എത്തുന്ന എന്ന തരത്തിൽ വാർത്തകൾ ഉണ്ടല്ലോ എന്ന ചോദ്യത്തിന്, ‘അതെങ്ങനെയാണ് വന്നതെന്ന് എനിക്കറിയില്ല. സിനിമയിൽ അത്തരത്തിലൊരു അതിഥിവേഷമില്ല’ – എന്ന മറുപടിയാണ് പൃഥ്വിരാജ് നൽകിയത്. കടുവയിൽ മോഹൻലാലിനെ കൊണ്ടുവരണമെന്ന് ആഗ്രഹിച്ചിരുന്നെങ്കിലും നടന്നില്ലെന്ന് സിനിമയുടെ സംവിധായകൻ ഷാജി കൈലാസും വ്യക്തമാക്കി.
ജൂൺ 30ന് ലോകമെമ്പാടുമുള്ള തിയറ്ററുകളിൽ ‘കടുവ’ റിലീസ് ചെയ്യും. എട്ട് വര്‍ഷത്തെ നീണ്ട ഇടവേളയ്ക്ക് ശേഷം ഷാജി കൈലാസ് സംവിധാനം ചെയ്യുന്ന ചിത്രം എന്ന പ്രത്യേകത കൂടിയുണ്ട് കടുവയ്ക്ക്. ബോളിവുഡ് താരം വിവേക് ഒബ്റോയ് ആണ് ചിത്രത്തിലെ വില്ലന്‍ കഥാപാത്രത്തെ അവതരിപ്പിക്കുന്നത്. ലൂസിഫര്‍ എന്ന ചിത്രത്തിന് ശേഷം വിവേക് ഒബ്റോയ് മലയാളത്തില്‍ വേഷമിടുന്ന ചിത്രം കൂടിയാണ് കടുവ.
മലയാളം, ഹിന്ദി, തെലുങ്ക്, തമിഴ്, കന്നഡ എന്നീ ഭാഷകളിലാകും ചിത്രം പ്രദര്‍ശനത്തിനെത്തുക. ഒരു പാന്‍ ഇന്ത്യന്‍ സിനിമ എന്ന നിലയിലാണ് ചിത്രം അവതരിപ്പിക്കുക. യുവ പ്ലാന്റർ കുറുവച്ചനായി പൃഥ്വിരാജ് അഭിനയിക്കുമ്പോൾ ഐ പി എസ് ഉദ്യോഗസ്ഥൻ ജോസഫ് ചാണ്ടി ആയാണ് വിവേക് ഒബ്റോയി എത്തുന്നത്. വിവേക് ഒബ്റോയ് അഭിനയിക്കുന്ന രണ്ടാമത്തെ മലയാള ചിത്രം കൂടിയാണ് കടുവ. സംയുക്ത മേനോൻ, സിദ്ദിഖ്, വിജയരാഘവൻ, സുദേവ് നായർ, സീമ, അർജുൻ അശോകൻ, കലാഭവൻ ഷാജോൺ, അജു വർഗീസ്, സായ്കുമാർ, ദിലീഷ് പോത്തൻ, രാഹുൽ മാധവ്, ജനാർദനൻ,റീനു മാത്യൂസ്, മീനാക്ഷി, പ്രിയങ്ക നായർ തുടങ്ങിയ താരനിരകളും ചിത്രത്തിൽ അണിനിരക്കുന്നു. ചിത്രത്തിന്റെ ഛായാഗ്രഹണം സുജിത്ത് വാസുദേവ്. തെന്നിന്ത്യൻ സംഗീതജ്ഞൻ എസ്. തമൻ ആണ് സംഗീതം. കലാസംവിധാനം– മോഹൻദാസ്. എഡിറ്റിങ് ഷമീർ മുഹമ്മദ്. ആദം ജോൺ, ലണ്ടന്‍ ബ്രിഡ്ജ്, മാസ്റ്റേർസ് എന്നീ ചിത്രങ്ങൾക്കു ശേഷം ജിനുവും പൃഥ്വിയും വീണ്ടും ഒന്നിക്കുന്ന ചിത്രമാണ് കടുവ.
