കൊവിഡ് പ്രതിസന്ധി നേരിടാന്‍ 10 ലക്ഷത്തി 25000 രൂപ തമിഴ്‌നാട് സര്‍ക്കാറിന് നല്‍കി നടന്‍ സൂരി. തമിഴ്‌നാട് മുഖ്യമന്ത്രിയുടെ ആഹ്വാനത്തെ തുടര്‍ന്നായിരുന്നാണ് ഇങ്ങനെ ഒരു തീരുമാനം. വിജയ്, രജനീകാന്ത്, സൂര്യ തുടങ്ങി തമിഴിലെ മുന്‍നിര താരങ്ങളെല്ലാം തന്നെ തമിഴ്‌നാട് മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്തിട്ടുണ്ട്.
10 ലക്ഷം രൂപ സൂരി സ്വന്തം പേരില്‍ നല്‍കിയപ്പോള്‍ ഇരുപത്തയ്യായിരം രൂപ സൂരിയുടെ രണ്ടു മക്കളുടെ പേരിലാണ് നല്‍കിയത്. ഇവര്‍ വര്‍ഷങ്ങളായി ചേര്‍ത്തുവെച്ച് പൈസയായിരുന്നു ഇത്. എന്തായാലും ഈ കുട്ടികളുടെ തീരുമാനം വലിയ കയ്യടിയാണ് സമൂഹ മാധ്യമങ്ങളില്‍ നിന്നും നേടിക്കൊണ്ടിരിക്കുന്നത്.
തമിഴിലെ പ്രശസ്ത ഹാസ്യനടന്‍ ആണ് സൂരി. കേരളത്തിലടക്കം തരംഗം തീര്‍ത്ത നിരവധി തമിഴ് സിനിമകളില്‍ ഇദ്ദേഹം ഹാസ്യനടനായി അഭിനയിച്ചിട്ടുണ്ട്. വിജയ് കേന്ദ്രകഥാപാത്രത്തെ അവതരിപ്പിച്ച ജില്ല എന്ന ചിത്രത്തില്‍ ശ്രദ്ധേയമായ ഒരു കഥാപാത്രത്തെ അവതരിപ്പിച്ചിരുന്നു. ഇന്ന് തമിഴിലെ മികച്ച ഹാസ്യനടന്‍മാരില്‍ ഒരാള്‍ മാത്രമല്ല മികച്ച സ്വഭാവ നടന്മാരില്‍ ഒരാള്‍ കൂടിയാണ് ഇദ്ദേഹം.
വിടുതലൈ ആണ് സൂരി ആദ്യമായി നായകനാകുന്ന ചിത്രം. ചിത്രം അധികം താമസിയാതെ റിലീസാകും. ഇന്ത്യയിലെ തന്നെ ഏറ്റവും മികച്ച സംവിധായകരില്‍ ഒരാളായ വെട്രിമാരന്‍ ആണ് ചിത്രം സംവിധാനം ചെയ്യുന്നത്. വിജയ് സേതുപതിയും മറ്റൊരു പ്രധാനപ്പെട്ട കഥാപാത്രത്തെ അവതരിപ്പിക്കുന്നുണ്ട്.
