മലയാളികൾക്ക് പ്രിയങ്കരിയാണ് ജ്യോതികൃഷ്ണ. ബോംബെ മാർച്ച് 12 എന്ന ചിത്രത്തിലൂടെ അഭിനയരംഗത്തേക്ക് കടന്നുവന്ന താരമാണ് ജ്യോതി. ഗോഡ് ഫോര്‍ സെയില്‍, ഞാന്‍, ലൈഫ് ഓഫ് ജോസൂട്ടി എന്നിങ്ങനെ ഒരുപിടി നല്ല വേഷങ്ങൾ ജ്യോതി കൃഷ്ണ ചെയ്തു. പിന്നീട് സിനിമയിൽ അവസരങ്ങൾ കുറഞ്ഞപ്പോൾ താരം ദുബായിൽ ഒരു സ്വകാര്യ എഫ് എമ്മിൽ ജോലി ചെയ്തു. അവിടെ വെച്ചാണ് താരം അരുൺ ആനന്ദരാജയുമായി പ്രണയത്തിലാകുന്നതും അവർ വിവാഹിതരാകുന്നത്. ഇപ്പോഴിതാ നടൻ സലിം കുമാറിനോട് വർഷങ്ങൾക്ക് ശേഷം മാപ്പ് അപേക്ഷിച്ചിരിക്കുകയാണ് നടി. സോറി ചലഞ്ചിന്റെ ഭാഗമായിട്ടാണ് നടി മാപ്പ് അപേക്ഷിച്ചിരിക്കുന്നത്. ആർ ജെ സ്നേഹ, സ്നേഹ ശ്രീകുമാർ, സ്വാസിക, കൃഷ്ണ പ്രഭ, പവിത്ര മേനോൻ, രജിത് മേനോൻ, ശാലിൻ, ജയശ്രീ ശിവദാസ് എന്നിവരെയും താരം ചലഞ്ച് ചെയ്‌തിട്ടുണ്ട്‌.
നമ്മുടെ എല്ലാവരുടെയും ജീവിതത്തിൽ തെറ്റുകളും ശരികളും സംഭവിക്കാറുണ്ട്. പക്ഷേ പല തെറ്റുകളിലും സോറി പറയാതെ ഈഗോ കാരണം മുന്നോട്ടുപോകാറുണ്ട്. ഈഗോ മാറ്റിവച്ച് സോറി പറഞ്ഞാൽ മനസിനു തന്നെ സമാധാനം ഉണ്ടാകും. അത് കേൾക്കുന്നവർക്കും സന്തോഷം. നമുക്കെല്ലാം പ്രിയങ്കരനായ സലിം കുമാർ ചേട്ടനോടാണ് എനിക്ക് ആദ്യം സോറി പറയേണ്ടത്. 2013ല്‍ മൂന്നാം നാള്‍ ഞായറാഴ്ചയുടെ സെറ്റില്‍ വച്ച്‌ ഞാനും സലീമേട്ടനും തമ്മിൽ വഴക്കുണ്ടായി. എന്റെ പക്വതയില്ലായ്മ കൊണ്ടാണ് അത് സംഭവിച്ചത്. ചെറിയൊരു കാര്യത്തിൽ തുടങ്ങിയതാണ്. നല്ലരീതിയിലുള്ള വഴക്കായി മാറി.
വഴക്കുണ്ടായ ശേഷം ഞങ്ങൾ പരസ്പരം മിണ്ടിയിട്ടില്ല. അന്ന് സിനിമ കഴിഞ്ഞ് സെറ്റില്‍ നിന്ന് എല്ലാവരോടും യാത്ര പറഞ്ഞ് ഇറങ്ങിയപ്പോള്‍ സലിം കുമാര്‍ ചേട്ടനോട് മാത്രം യാത്ര പറഞ്ഞില്ല. പിന്നീട് ഞാന്‍ ചെയ്തത് ശരിയായില്ല എന്ന് അദ്ദേഹം പറഞ്ഞതായി അറിഞ്ഞു. എനിക്കും അറിയാം ആ ചെയ്തത് ശരിയായില്ല എന്ന്. പക്ഷേ ആ ഒരു പ്രായത്തിന്റെ പക്വതക്കുറവും വാശിയും ഒക്കെയാകാം. ഇന്ന് അത് ആലോചിക്കുമ്പോൾ എനിക്കു സ്വയം പുച്ഛം തോന്നുന്നു. അദ്ദേഹവുമായി പിന്നീട് സംസാരിച്ചിട്ടുണ്ടെങ്കിലും സോറി പറയാന്‍ പറ്റിയിരുന്നില്ല. എന്റെ ഹൃദയത്തിന്റെ അടിത്തട്ടിൽ നിന്നും ഞാൻ അദ്ദേഹത്തോട് ക്ഷമ ചോദിക്കുന്നു.
