നടിയെന്ന നിലയിലും എഴുത്തുകാരി എന്ന നിലയിലും ശ്രദ്ധേയയാണ് ലക്ഷ്മിപ്രിയ. ബിഗ് ബോസ് സീസണ്‍ ഫോറില്‍ മത്സരാര്‍ത്ഥിയായി എത്തിയതോടെയാണ് ലക്ഷ്മിപ്രിയയെ കൂടുതല്‍ ആളുകള്‍ അറിഞ്ഞത്. ബിഗ് ബോസ് ഗ്രാന്‍ഡ് ഫിനാലെയില്‍ അവസാന ആറില്‍ എത്തിയ ലക്ഷ്മിയ നാലാം സ്ഥാനമാണ് കരസ്ഥമാക്കിയത്. ബിഗ് ബോസ് ഹൗസില്‍ നൂറ് ദിവസം പൂര്‍ത്തിയാക്കി തിരികെയെത്തിയ ലക്ഷ്മിപ്രിയയെ സ്വീകരിക്കാന്‍ എയര്‍പോര്‍ട്ടില്‍ ഭര്‍ത്താവ് ജയേഷും മകള്‍ മാതംഗിയും എത്തിയിരുന്നു.
ഭര്‍ത്താവിന്റെ കാല്‍ തൊട്ട് വണങ്ങിയും മകളെ വാരി പുണര്‍ന്നുമാണ് ലക്ഷ്മി പ്രിയ സന്തോഷം പ്രകടിപ്പിച്ചത്. ബിഗ് ബോസ് ഹൗസില്‍ 100 ദിവസങ്ങള്‍ പൂര്‍ത്തിയാക്കുക എന്നത് ഒട്ടും ഈസിയായിരുന്നില്ലെന്ന് ലക്ഷ്മിപ്രിയ പറഞ്ഞു. തന്നെ ഓര്‍ത്ത് തനിക്ക് അഭിമാനമുണ്ട്. ബിഗ് ബോസ് ഹൗസില്‍ ജീവിച്ചതുകൊണ്ട് ലോകത്തിന്റെ ഏത് കോണില്‍ പോയാലും ഇനി ജീവിക്കാന്‍ പറ്റും. ബിഗ് ബോസ് ഹൗസ് നെഗറ്റീവ് എനര്‍ജിയുള്ള സ്ഥലമാണെന്നാണ് മത്സരാര്‍ഥികളില്‍ പലരും പറഞ്ഞിരുന്നത്. തനിക്ക് അങ്ങനെ തോന്നിയിട്ടില്ല.’ ‘എന്റെ ജപവും പ്രാര്‍ത്ഥനയും കൊണ്ട് ഞാന്‍ അവിടെയെല്ലാം പോസറ്റീവ് എനര്‍ജി നിറച്ചിരുന്നു. ദില്‍ഷയാണ് യഥാര്‍ഥ വിന്നറെന്ന് പറയാന്‍ പറ്റില്ല. ഒരു മനുഷ്യന്‍ കടന്നുപോകേണ്ട എല്ലാ വൈകാരിക വിക്ഷോഭങ്ങളിലൂടെയും കടന്നുപോയിട്ടുണ്ടോ?, ഒറ്റയ്ക്കുള്ള ഗെയിമായിരുന്നോ? എന്നൊക്കെയുള്ളത് വിലയിരുത്തണം’, ലക്ഷ്മിപ്രിയ പറഞ്ഞു.
ഇത്തരം ഗെയിം ഷോകളില്‍ പങ്കെടുക്കുമ്പോള്‍ ഒറ്റയ്ക്ക് നിന്ന് മത്സരിക്കുകയാണ് വേണ്ടത്. ആ വീട്ടിലെ ആര് തളര്‍ന്ന് പോയാലും താന്‍ ചേര്‍ത്ത് പിടിക്കാറുണ്ടായിരുന്നു. ഫൈനല്‍ സിക്‌സ് വരെ എത്തുന്നത് വലിയ കാര്യമാണ്. താന്‍ വൃത്തി കൂടുതലുള്ള വ്യക്തിയായതിനാല്‍ ഭര്‍ത്താവ് അടക്കമുള്ളവര്‍ തന്നോട് പറഞ്ഞത് അധികനാള്‍ ഹൗസില്‍ നില്‍ക്കില്ലെന്നാണ്.’ ‘അത് കേട്ടപ്പോള്‍ മുതല്‍ ജയേഷേട്ടനോട് വാശിയായി. അങ്ങനെയാണ് നൂറ് ദിവസം തികയ്ക്കണമെന്ന ആഗ്രഹം വന്നതെന്നും ലക്ഷ്മിപ്രിയ പറഞ്ഞു.
