വിവാഹവാർഷിക ആഘോഷത്തിന്റെ സന്തോഷം പങ്കുവെച്ച് നടി മഞ്ജു സുനിച്ചൻ. ഭർത്താവ് സുനിച്ചനും മകൻ ബെർണാഡിനുമൊപ്പമുള്ള ചിത്രം സോഷ്യൽ മീഡിയയിൽ പങ്കുവെച്ചാണ് നടി പതിനാറാം വിവാഹവാർഷികത്തിന്റെ സന്തോഷം ആരാധകരുമായി പങ്കുവെച്ചത്. ആശംസകൾ നേർന്ന് നിരവധി താരങ്ങളാണ് കമന്റ് ബോക്സിൽ എത്തിയത്. ‘അങ്ങനെ 16 വർഷങ്ങൾക്ക് മുൻപ് ഒരുമിച്ചു തുടങ്ങിയ യാത്ര ഇനിയും മുന്നോട്ട്… ഒരുപാട് കാതങ്ങൾ മുന്നോട്ട്.’ – മഞ്ജു സോഷ്യൽ മീഡിയയിൽ കുറിച്ചു.
കൊച്ചി കിഴക്കമ്പലത്ത് ജനിച്ച മഞ്ജു അഭിനേതാവിനൊപ്പം തന്നെ നല്ലൊരു നർത്തകി കൂടിയാണ്. ആദ്യമായി മഞ്ജു ക്യാമറയ്ക്ക് മുന്നിലെത്തിയത് ചക്രം എന്ന സിനിമയിലൂടെയാണ്. സംവിധായകൻ ലോഹിതദാസാണ് അഭിനയിക്കാനുള്ള അവസരം നൽകിയത്. പിന്നീട് മനോരമ ചാനലിലെ ദമ്പതികളുടെ റിയാലിറ്റി ഷോ ആയ വെറുതെ അല്ല ഭാര്യയുടെ രണ്ടാം സീസണിൽ പങ്കെടുത്താണ് ടെലിവിഷനിൽ അരങ്ങേറിയത്. പിന്നീട്, മനോരമയിലെ തന്നെ മറിമായം എന്ന കോമഡി പരിപാടിയിലൂടെ മിനിസ്ക്രീൻ അഭിനയരംഗത്ത് സജീവമായി. ബിഗ് ബോസിന്റെ രണ്ടാം സീസണിൽ മത്സരാർത്ഥിയായിരുന്നു.
സിനിമയിലും സജീവമാണ് മഞ്ജു. നേരത്തെ മഞ്ജുവിന്റെ വിവാഹബന്ധം തകർന്നെന്ന് വാർത്തകൾ പരന്നിരുന്നു. എന്നാൽ അതെല്ലാം കെട്ടുകഥകളാണെന്ന് വ്യക്തമാക്കി നടി തന്നെ രംഗത്തു വന്നു. ഏതായാലും വിവാഹവാർഷിക ദിനത്തിൽ ഭർത്താവിനും മകനുമൊപ്പമുള്ള ചിത്രം പങ്കുവെച്ച് വ്യക്തമായ മറുപടി കൂടി നൽകുകയാണ് മഞ്ജു. നിരവധി ആരാധകരും സിനിമാ താരങ്ങളും മഞ്ജുവിന് ആശംസകളുമായി എത്തിയിട്ടുണ്ട്.
