ഒരു ഇടവേളയ്ക്ക് ശേഷം വീണ്ടും സീരിയലുകളിൽ സജീവമായിരിക്കുകയാണ് മേഘ്ന വിൻസെന്റ്. വിവാഹവും വിവാഹമോചനവും ജീവിതത്തിൽ സംഭവിച്ചെങ്കിലും അതൊന്നും തന്റെ ജീവിതത്തെ ബാധിക്കാതിരിക്കാൻ മേഘ്ന ശ്രദ്ധിച്ചു. ഇപ്പോൾ ഇതാ സീ കേരളത്തിൽ സംപ്രേക്ഷണം ചെയ്യുന്ന ‘മിസിസ് ഹിറ്റ്ലർ’ എന്ന പരമ്പരയിലൂടെ ആരാധകഹൃദയം കവർന്നിരിക്കുകയാണ് താരം. അതേസമയം, വീണ്ടും വിവാഹിതയാകുമോ എന്ന ചോദ്യത്തിന് ഉടനെയൊന്നും വിവാഹമില്ലെന്ന് ആയിരുന്നു താരത്തിന്റെ മറുപടി. ഇന്ത്യഗ്ലിറ്റ്സ് മലയാളത്തിന് നൽകിയ അഭിമുഖത്തിൽ ആയിരുന്നു മേഘ്ന ഇങ്ങനെ പറഞ്ഞത്.
ജീവിതത്തിൽ സമാധാനമാണ് തനിക്ക് ഏറ്റവും പ്രധാനപ്പെട്ടതെന്നാണ് താരത്തിന്റെ നിലപാട്. ഇപ്പോഴത്തെ റിലേഷൻഷിപ്പ് സ്റ്റാറ്റസ് എന്താണെന്ന ചോദ്യത്തിന് ‘സിംഗിൾ’ ആണെന്നും ‘നോ റെഡി ടു മിംഗിൾ’ ആണെന്നും ചിരിച്ചുകൊണ്ട് മേഘ്ന പറഞ്ഞു. ലവ് മാര്യേജ് ആണോ അറേഞ്ച്ഡ് മാര്യേജ് ആണോ നല്ലതെന്ന ചോദ്യത്തിന് ഏതാണെങ്കിലും സമാധാനമായി ജീവിച്ചാൽ മതിയെന്ന് ആയിരുന്നു മേഘ്നയുടെ മറുപടി.
ജീവിതത്തിൽ മറക്കാൻ ആഗ്രഹിക്കുന്ന കാര്യം എന്താണെന്ന് ചോദിച്ചപ്പോൾ ‘ഒരു കാര്യവും മറക്കരുത്’ എന്നായിരുന്നു മേഘ്നയുടെ മറുപടി. ജീവിതത്തിൽ സംഭവിച്ചത് നമ്മളെ നമ്മളാക്കിയ കുറേ കാര്യങ്ങളാണ്. അതൊക്കെ മറന്നാൽ നമ്മൾ നമ്മളല്ലാതായി പോകുമെന്നും ജീവിതത്തിൽ സംഭവിച്ച ചില കാര്യങ്ങളിൽ നിന്ന് പാഠം പഠിക്കണമെന്നും മേഘ്ന പറഞ്ഞു. ചിലത് നമ്മുടെ തെറ്റുകളാകാം, അതൊന്നും മറക്കേണ്ടതില്ല. അതിൽ നിന്ന് നല്ലത് ഉൾക്കൊണ്ട് മുന്നോട്ടു പോകുകയാണ് വേണ്ടതെന്നും മേഘ്ന പറഞ്ഞു. സിനിമയും സീരിയലും ഒരുപോലെ ഇഷ്ടമാണെന്നും ആദ്യപ്രണയം നൃത്തമാണെന്നും പറഞ്ഞ മേഘ്ന പാട്ട് പാടാനും ഇഷ്ടമാണെന്ന് പറഞ്ഞു.
