ആരാധകരെ ആവേശത്തിലാക്കി അജിത്ത് നായകനാകുന്ന ‘വലിമൈ’യുടെ മേക്കിംഗ് വീഡിയോ പുറത്തിറങ്ങി. സാധാരണ മേക്കിംഗ് വീഡിയോകളിൽ നിന്ന് വ്യത്യസ്തമായാണ് ഇതിന്റെ മേക്കിംഗ് വീഡിയോ. ഹൈവേകളിൽ അവതരിപ്പിക്കുന്ന ബൈക്ക് സ്റ്റണ്ടുകളുടെ ഭയാനകമായ ഷോട്ടുകൾ ആണ് ഈ മേക്കിംഗ് വീഡിയോയുടെ പ്രത്യേകത. പകർച്ചവ്യാധി കാരണം സിനിമയുടെ ഷൂട്ടിംഗ് സ്തംഭിച്ചത് എങ്ങനെയെന്നും പതിവ് അപ്‌ഡേറ്റുകൾ പങ്കിടാത്തതിന് സോഷ്യൽ മീഡിയയിൽ അവർക്ക് നേരിടേണ്ടി വന്ന പരിഹാസവും വീഡിയോയിൽ വ്യക്തമാക്കുന്നു. ‘വലിമൈ അപ്‌ഡേറ്റ്’ സൈബർ ഇടങ്ങളിൽ ഒരിടയ്ക്ക് വലിയ തമാശയായി മാറിയിരുന്നു.
വീലി (ബൈക്കിന്റെ മുന്നിലത്തെ ടയർ മാത്രം പൊക്കി വണ്ടി ഓടിക്കുന്നത്) ചെയ്യാൻ ശ്രമിക്കുന്നതിനിടെ അജിത്ത് താഴെ വീഴുന്നതാണ് ഇതിലെ ഹൈലൈറ്റ്. എന്നാൽ, താഴെ വീണിടത്തു നിന്നും എഴുന്നേറ്റ് അജിത്ത് വീണ്ടും വീലി ചെയ്യുന്നത് കാണാം. എച്ച് വിനോദ് രചനയും സംവിധാനവും നിർവ്വഹിക്കുന്ന ഈ ചിത്രം ഒരു മാസ് ആക്ഷൻ എന്റർടെയ്‌നറായിരിക്കും. പൊലീസ് വേഷത്തിലാണ് അജിത്ത് എത്തുന്നത്. ബോളിവുഡ് നടി ഹുമ ഖുറേഷിയാണ് നായിക. ‘ആർഎക്‌സ് 100’ ഫെയിം തെലുങ്ക് നടൻ കാർത്തികേയ ഗുമ്മകൊണ്ടയാണ് വല്ലൻ വേഷത്തിൽ എത്തുന്നു. ബാനി, സുമിത്ര, അച്യുന്ത് കുമാർ, യോഗി ബാബു, രാജ് അയ്യപ്പ, പുഗാജ്, ദ്രുവൻ, പേളി മാണി തുടങ്ങിവരാണ് ചിത്രത്തിലെ മറ്റ് അഭിനേതാക്കൾ.
ബോണി കപൂറിന്റെ ബേവ്യൂ പ്രൊജക്ട്‌സ് എൽഎൽപിയും സീ സ്റ്റുഡിയോയും ചേർന്നാണ് ചിത്രം നിർമ്മിക്കുന്നത്. 2022 പൊങ്കലിന് ചിത്രം പ്രദർശനത്തിനെത്തും. എന്നാൽ റിലീസ് തീയതി നിർമ്മാതാക്കൾ ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
